| آشیانہ بہت ضروری ہے |
| اک ٹھکانہ بہت ضروری ہے |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| اب تمہیں کس طرح بتاؤں مَیں |
| گھر پرانا بہت ضروری ہے |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| دِل کو آباد رکھنے کی خاطر |
| دِل لگانا بہت ضروری ہے |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| ورنہ یہ درد مار ڈالے گا |
| کھلکھلانا بہت ضروری ہے |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| یاد رکھنا بڑی اذیت ہے |
| بُھول جانا بہت ضروری ہے |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| غم سے پتھرائی آنکھ میں یارو |
| اشک آنا بہت ضروری ہے |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| اتنی نزدیکیاں نہیں اچھی |
| دُور جانا بہت ضروری ہے |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| پاس جانے کے واسطے اُس کے |
| اِک بہانہ بہت ضروری ہے |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| رنگ کچھ شاعری میں میری بھی |
| عاشقانہ بہت ضروری ہے |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| درد مندوں کے اور ضعیفوں کے |
| کام آنا بہت ضروری ہے |
| ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ |
| غم چُھپانے کے واسطے مانی |
| مُسکرانا بہت ضروری ہے |
معلومات