| جو قیمتی تھا وقت گزارا کہاں کہاں |
| میں نے نہ جانے تم کو پکارا کہاں کہاں |
| بھٹکوں میں اس جہاں میں خدارا کہاں کہاں |
| لے جائے گا یہ مجھ کو ستارہ کہاں کہاں |
| غفلت زدہ ہوں ایسی کہ کچھ بھی خبر نہیں |
| مجھ کو ہوا ہے کتنا خسارہ کہاں کہاں |
| الزامِ بے وفائی ہے میرے ہی سر پہ کیوں |
| ہر وقت میں نے تم کو پکارا کہاں کہاں |
| بے خانماں تھا قیس بھی لیلی کی چاہ میں |
| پھرتا تھا دشت میں وہ بچارہ کہاں کہاں |
| مجنوں ہیں دفن دشت میں فرہاد کوہ میں |
| قبریں ہیں عاشقوں کی بھی یارا کہاں کہاں |
| پایا ہے مدتوں میں کہیں پھر سے کھو نہ دوں |
| ڈھونڈوں گی خود کو پھر میں دوبارہ کہاں کہاں |
| ہے تذکرہ ہمارا یہاں ہر زبان پر |
| لکھا ہے نام تم نے ہمارا کہاں کہاں |
| اک دشتِ لا حساب میں دل کھو گیا مرا |
| جاؤں میں اس کو ڈھونڈنے یارا کہاں کہاں |
| الفت کے بیج بوئے ہیں اب دیکھ شائلؔہ |
| ملتا ہے اس چمن میں سہارا کہاں کہاں |
معلومات