بحر کی معلومات

7 جنوری
غزل

میر تقی میر

بارے دنیا میں رہو غم زدہ یا شاد رہو

ایسا کچھ کر کے چلو یاں کہ بہت یاد رہو

عشق پیچے کی طرح حسن گرفتاری ہے

لطف کیا سرو کی مانند گر آزاد رہو

ہم کو دیوانگی شہروں ہی میں خوش آتی ہے

دشت میں قیس رہو کوہ میں فرہاد رہو

بارے دنیا میں رہو غم زدہ یا شاد رہو

فاعِلاتن فَعِلاتن فَعِلاتن فَعِلن

967

27 دسمبر
غزل

میر تقی میر

مہر کی تجھ سے توقع تھی ستمگر نکلا

موم سمجھے تھے ترے دل کو سو پتھر نکلا

داغ ہوں رشک محبت سے کہ اتنا بیتاب

کس کی تسکیں کے لیے گھر سے تو باہر نکلا

جیتے جی آہ ترے کوچے سے کوئی نہ پھرا

جو ستم دیدہ رہا جا کے سو مر کر نکلا

مہر کی تجھ سے توقع تھی ستمگر نکلا

فاعِلاتن فَعِلاتن فَعِلاتن فَعِلن

569

29 جولائی
غزل

میر تقی میر

کیا مصیبت زدہ دل مائلِ آزار نہ تھا

کون سے درد و ستم کا یہ طرف دار نہ تھا

آدمِ خاکی سے عالم کو جلا ہے ورنہ

آئنہ تھا یہ ولے قابلِ دیدار نہ تھا

دھوپ میں جلتی ہیں غربت وطنوں کی لاشیں

تیرے کوچے میں مگر سایۂ دیوار نہ تھا

کیا مصیبت زدہ دل مائلِ آزار نہ تھا

فاعِلاتن فَعِلاتن فَعِلاتن فَعِلن

428

29 جولائی
شعر

مرزا غالب

زندگی اپنی جب اس شکل سے گزری غالبؔ

ہم بھی کیا یاد کریں گے کہ خدا رکھتے تھے

زندگی اپنی جب اس شکل سے گزری غالبؔ

فاعِلاتن فَعِلاتن فَعِلاتن فِعْلن

843

29 جولائی
غزل

میر تقی میر

جی میں ہے یادِ رخ و زلفِ سیہ فام بہت

رونا آتا ہے مجھے ہر سحر و شام بہت

دستِ صیاد تلک بھی نہ میں پہنچا جیتا

بے قراری نے لیا مجھ کو تۂ دام بہت

ایک دو چشمک ادھر گردشِ ساغر کہ مدام

سر چڑھی رہتی ہے یہ گردشِ ایّام بہت

جی میں ہے یادِ رخ و زلفِ سیہ فام بہت

فاعِلاتن فَعِلاتن فَعِلاتن فَعِلن

1310

29 جولائی
نظم

ن م راشد

کوئی دیتا ہے بہت دور سے آواز مجھے

چھپ کے بیٹھا ہے وہ شاید کسی سیّارے میں

نغمہ و نور کے اک سرمدی گہوارے میں

دے اجازت جو تری چشمِ فسوں ساز مجھے

اور ہو جائے محبت پرِ پرواز مجھے

اڑ کے پہنچوں میں وہاں روح کے طیّارے میں

رفعت (سانیٹ)

فاعِلاتن فَعِلاتن فَعِلاتن فَعِلن

1165

29 جولائی
غزل

مرزا غالب

آپ نے مَسَّنی الضُّرُّ کہا ہے تو سہی

یہ بھی اے حضرتِ ایّوب! گِلا ہے تو سہی

رنج طاقت سے سوا ہو تو نہ پیٹوں کیوں سر

ذہن میں خوبئِ تسلیم و رضا ہے تو سہی

ہے غنیمت کہ بہ اُمّید گزر جاۓ گی عُمر

نہ ملے داد، مگر روزِ جزا ہے تو سہی

آپ نے مَسَّنیَ الضُّرُّ کہا ہے تو سہی

فاعِلاتن فَعِلاتن فَعِلاتن فَعِلن

866

29 جولائی
غزل

مرزا غالب

آہ کو چاہیے اِک عُمر اثر ہونے تک

کون جیتا ہے تری زُلف کے سر ہونے تک

دامِ ہر موج میں ہے حلقۂ صد کامِ نہنگ

دیکھیں کیا گُزرے ہے قطرے پہ گُہر ہونے تک

عاشقی صبر طلب ، اور تمنّا بیتاب

دل کا کیا رنگ کروں خونِ جگر ہونے تک

آہ کو چاہیے اِک عُمر اثر ہونے تک

فاعِلاتن فَعِلاتن فَعِلاتن فِعْلن

1856

29 جولائی
غزل

مرزا غالب

مُژدہ ، اے ذَوقِ اسیری ! کہ نظر آتا ہے

دامِ خالی ، قفَسِ مُرغِ گِرفتار کے پاس

جگرِ تشنۂ آزار ، تسلی نہ ہوا

جُوئے خُوں ہم نے بہائی بُنِ ہر خار کے پاس

مُند گئیں کھولتے ہی کھولتے آنکھیں ہَے ہَے!

خُوب وقت آئے تم اِس عاشقِ بیمار کے پاس

مُژدہ ، اے ذَوقِ اسیری ! کہ نظر آتا ہے

فاعِلاتن فَعِلاتن فَعِلاتن فَعِلن

427

29 جولائی
غزل

مرزا غالب

حسن غمزے کی کشاکش سے چھٹا میرے بعد

بارے آرام سے ہیں اہلِ جفا میرے بعد

منصبِ شیفتگی کے کوئی قابل نہ رہا

ہوئی معزولئ انداز و ادا میرے بعد

شمع بجھتی ہے تو اس میں سے دھواں اٹھتا ہے

شعلۂ عشق سیہ پوش ہوا میرے بعد

حسن غمزے کی کشاکش سے چھٹا میرے بعد

فاعِلاتن فَعِلاتن فَعِلاتن فِعْلن

539

29 جولائی
شعر

مرزا غالب

مند گئیں کھولتے ہی کھولتے آنکھیں غالبؔ

یار لائے مری بالیں پہ اسے، پر کس وقت

مند گئیں کھولتے ہی کھولتے آنکھیں غالبؔ

فاعِلاتن فَعِلاتن فَعِلاتن فِعْلن

371

29 جولائی
غزل

مرزا غالب

پھر ہوا وقت کہ ہو بال کُشا موجِ شراب

دے بطِ مے کو دل و دستِ شنا موجِ شراب

پوچھ مت وجہ سیہ مستئ اربابِ چمن

سایۂ تاک میں ہوتی ہے ہَوا موجِ شراب

جو ہوا غرقۂ مے بختِ رسا رکھتا ہے

سر پہ گزرے پہ بھی ہے بالِ ہما موجِ شراب

پھر ہوا وقت کہ ہو بال کُشا موجِ شراب

فاعِلاتن فَعِلاتن فَعِلاتن فَعِلن

294

29 جولائی
شعر

مرزا غالب

پھر وہ سوئے چمن آتا ہے خدا خیر کرے

رنگ اڑتا ہے گُلِستاں کے ہوا داروں کا

پھر وہ سوئے چمن آتا ہے خدا خیر کرے

فاعِلاتن فَعِلاتن فَعِلاتن فَعِلن

516

29 جولائی
غزل

مرزا غالب

عشرتِ قطرہ ہے دریا میں فنا ہو جانا

درد کا حد سے گزرنا ہے دوا ہو جانا

تجھ سے، قسمت میں مری، صورتِ قفلِ ابجد

تھا لکھا بات کے بنتے ہی جدا ہو جانا

دل ہوا کشمکشِ چارۂ زحمت میں تمام

مِٹ گیا گھِسنے میں اُس عُقدے کا وا ہو جانا

عشرتِ قطرہ ہے دریا میں فنا ہو جانا

فاعِلاتن فَعِلاتن فَعِلاتن فَعِلن

1920

29 جولائی
قطعہ

مرزا غالب

سرمۂ مفتِ نظر ہوں مری قیمت یہ ہے

کہ رہے چشمِ خریدار پہ احساں میرا

رخصتِ نالہ مجھے دے کہ مبادا ظالم

تیرے چہرے سے ہو ظاہر غمِ پنہاں میرا

سرمۂ مفتِ نظر ہوں مری قیمت یہ ہے

فاعِلاتن فَعِلاتن فَعِلاتن فِعْلن

480

29 جولائی
قطعہ

مرزا غالب

لکھنؤ آنے کا باعث نہیں کھلتا یعنی

ہوسِ سیر و تماشا، سو وہ کم ہے ہم کو

مقطعِ سلسلۂ شوق نہیں ہے یہ شہر

عزمِ سیرِ نجف و طوفِ حرم ہے ہم کو

لیے جاتی ہے کہیں ایک توقّع غالبؔ

جادۂ رہ کششِ کافِ کرم ہے ہم کو

لکھنؤ آنے کا باعث نہیں کھلتا یعنی

فاعِلاتن فَعِلاتن فَعِلاتن فِعْلن

739

29 جولائی
شعر

مرزا غالب

اگ رہا ہے در و دیوار سے سبزہ غالبؔ

ہم بیاباں میں ہیں اور گھر میں بہار آئی ہے

اگ رہا ہے در و دیوار سے سبزہ غالبؔ

فاعِلاتن فَعِلاتن فَعِلاتن فِعْلن

751

29 جولائی
غزل

مرزا غالب

گرمِ فریاد رکھا شکلِ نہالی نے مجھے

تب اماں ہجر میں دی بردِ لیالی نے مجھے

نسیہ و نقدِ دو عالم کی حقیقت معلوم

لے لیا مجھ سے مری ہمّتِ عالی نے مجھے

کثرت آرائیِ وحدت ہے پرستارئ وہم

کر دیا کافر ان اصنامِ خیالی نے مجھے

گرمِ فریاد رکھا شکلِ نہالی نے مجھے

فاعِلاتن فَعِلاتن فَعِلاتن فَعِلن

304

29 جولائی
شعر

مرزا غالب

گھر میں تھا کیا کہ ترا غم اسے غارت کرتا

وہ جو رکھتے تھے ہم اک حسرتِ تعمیر، سو ہے

گھر میں تھا کیا کہ ترا غم اسے غارت کرتا

فاعِلاتن فَعِلاتن فَعِلاتن فِعْلن

561

29 جولائی
غزل

احمد فراز

عشق تو ایک کرشمہ ہے فسوں ہے یوں ہے

یوں تو کہنے کو سبھی کہتے ہیں یوں ہے یوں ہے

جیسے کوئی درِ دل پر ہو ستادہ کب سے

ایک سایہ نہ دروں ہے نہ بروں ہے یوں ہے

تم محبت میں کہاں سود و زیاں لے آئے

عشق کا نام خِرد ہے نہ جَنوں ہے یوں ہے

عشق تو ایک کرشمہ ہے فسوں ہے یوں ہے

فاعِلاتن فَعِلاتن فَعِلاتن فِعْلن

1946

29 جولائی
غزل

میر تقی میر

نکلے چشمہ جو کوئی جوشِ زناں پانی کا

یاددہ ہے وہ کسو چشم کی گریانی کا

لطف اگر یہ ہے بتاں صندلِ پیشانی کا

حسن کیا صبح کے پھر چہرئہ نورانی کا

کفر کچھ چاہیے اسلام کی رونق کے لیے

حسن زنار ہے تسبیح سلیمانی کا

نکلے چشمہ جو کوئی جوشِ زناں پانی کا

فاعِلاتن فَعِلاتن فَعِلاتن فِعْلن

471

29 جولائی
نظم

مصطفیٰ زیدی

مجھ کو محصور کیا ہے مری آگاہی نے

میں نہ آفاق کا پابند، نہ دیواروں کا

میں نہ شبنم کا پرستار، نہ انگاروں کا

اہلِ ایقان کا حامی نہ گنہگاروں کا

نہ خلاؤں کا طلب گار، نہ سیّاروں کا

☆☆☆

آدمی

فاعِلاتن فَعِلاتن فَعِلاتن فِعْلن

1379

29 جولائی
غزل

احمد فراز

وہ تو پتھر پہ بھی گزرے نہ خدا ہونے تک

جو سفر میں نے نہ ہونے سے کیا ہونے تک

زندگی اس سے زیادہ تو نہیں عمر تری

بس کسی دوست کے ملنے سے جدا ہونے تک

ایک اِک سانس مری رہن تھی دِلدار کے پاس

نقدِ جاں بھی نہ رہا قرض ادا ہونے تک

وہ تو پتھر پہ بھی گزرے نہ خدا ہونے تک

فاعِلاتن فَعِلاتن فَعِلاتن فِعْلن

1131

29 جولائی
غزل

داغ دہلوی

عذر آنے میں بھی ہے اور بلاتے بھی نہیں

باعثِ ترک ملاقات بتاتے بھی نہیں

منتظر ہیں دمِ رخصت کہ یہ مرجائے تو جائیں

پھر یہ احسان کہ ہم چھوڑ کے جاتے بھی نہیں

سر اٹھاؤ تو سہی آنکھ ملاؤ تو سہی

نشۂ مے بھی نہیں نیند کے ماتے بھی نہیں

عذر آنے میں بھی ہے اور بلاتے بھی نہیں

فاعِلاتن فَعِلاتن فَعِلاتن فَعِلن

2370

29 جولائی
غزل

امیر مینائی

مُوئے مِژگاں سے تِرے سینکڑوں مرجاتے ہیں

یہی نشتر تو رگِ جاں میں اُتر جاتے ہیں

حرم و دیر ہیں عُشاق کے مُشتاق مگر

تیرے کوُچے سے اِدھر یہ نہ اُدھر جاتے ہیں

کوچۂ یار میں اوّل تو گُزر مُشکل ہے

جو گُزرتے ہیں زمانے سے گُزر جاتے ہیں

مُوئے مِژگاں سے تِرے سینکڑوں مرجاتے ہیں

فاعِلاتن فَعِلاتن فَعِلاتن فِعْلن

1797

29 جولائی
نظم

فیض احمد فیض

پھر کوئی آیا دلِ زار نہیں کوئی نہیں

راہرو ہوگا کہیں اور چلا جائے گا

ڈھل چکی رات بکھرنے لگا تاروں کا غبار

لڑکھڑانے لگے ایوانوں میں خوابیدہ چراغ

سوگئی راستہ تک تک کے ہر اک راہ گزار

اجنبی خاک نے دھندلا دیے قدموں کے سراغ

تنہائی

فاعِلاتن فَعِلاتن فَعِلاتن فَعِلن

980

29 جولائی
غزل

احمد فراز

ہم کہ منت کشِ صیاد نہیں ہونے کے

وہ جو چاہے بھی تو آزاد نہیں ہونے کے

دیکھ آ کر کبھی ان کو بھی جو تیرے ہاتھوں

ایسے اُجڑے ہیں کہ آباد نہیں ہونے کے

وصفِ مے اور صفتِ یار کے مضموں کے سوا

ناصحا تیرے سخن یاد نہیں ہونے کے

ہم کہ منت کشِ صیاد نہیں ہونے کے

فاعِلاتن فَعِلاتن فَعِلاتن فِعْلن

533

29 جولائی
غزل

محسن نقوی

مرحلے شوق کے دُشوار ہُوا کرتے ہیں

سائے بھی راہ کی دیوار ہُوا کرتے ہیں

وہ جو سچ بولتے رہنے کی قسم کھاتے ہیں

وہ عدالت میں گُنہگار ہُوا کرتے ہیں

صرف ہاتھوں کو نہ دیکھو کبھی آنکھیں بھی پڑھو

کچھ سوالی بڑے خودار ہُوا کرتے ہیں

مرحلے شوق کے دُشوار ہُوا کرتے ہیں

فاعِلاتن فَعِلاتن فَعِلاتن فِعْلن

3505

29 جولائی
نظم

فیض احمد فیض

رات یوں دل میں تری کھوئی ہوئی یاد آئی

جیسے ویرانے میں چپکے سے بہار آ جائے

جیسے صحراؤں میں ہولے سے چلے بادِ نسیم

جیسے بیمار کو بے وجہ قرار آ جائے

رات یوں دل میں تری کھوئی ہوئی یاد آئی

فاعِلاتن فَعِلاتن فَعِلاتن فِعْلن

3240

29 جولائی
نظم

اختر الایمان

شام ہوتی ہے سحر ہوتی ہے یہ وقت رواں

جو کبھی سنگ گراں بن کے مرے سر پہ گرا

راہ میں آیا کبھی میری ہمالہ بن کر

جو کبھی عقدہ بنا ایسا کہ حل ہی نہ ہوا

اشک بن کر مری آنکھوں سے کبھی ٹپکا ہے

جو کبھی خونِ جگر بن کے مژہ پر آیا

بے تعلقی

فاعِلاتن فَعِلاتن فَعِلاتن فَعِلن

1161

29 جولائی
نظم

فیض احمد فیض

اس ہوس میں کہ پکارے جرسِ گل کی صدا

دشت و صحرا میں صبا پھرتی ہے یوں آوارہ

جس طرح پھرتے ہیں ہم اہلِ جنوں آوارہ

ہم پہ وارفتگیِ ہوش کی تہمت نہ دھرو

ہم کہ رمازِ رموزِ غمِ پنہانی ہیں

اپنی گردن پہ بھی ہے رشتہ فگن خاطرِ دوست

جرسِ گُل کی صدا

فاعِلاتن فَعِلاتن فَعِلاتن فَعِلن

339

29 جولائی
نظم

فیض احمد فیض

دیکھنے کی تو کسے تاب ہے لیکن اب تک

جب بھی اس راہ سے گزرو تو کسی دکھ کی کسک

ٹوکتی ہے کہ وہ دروازہ کھلا ہے اب بھی

اور اس صحن میں ہر سو یونہی پہلے کی طرح

فرشِ نومیدیِ دیدار بچھا ہے اب بھی

اور کہیں یاد کسی دل زدہ بچے کی طرح

فرشِ نومیدیِ دیدار

فاعِلاتن فَعِلاتن فَعِلاتن فِعْلن

341

29 جولائی
غزل

فیض احمد فیض

یوں سجا چاند کہ جھلکا ترے انداز کا رنگ

یوں فضا مہکی کہ بدلا مرے ہمراز کا رنگ

سایۂ چشم میں‌ حیراں رُخِ روشن کا جمال

سُرخیٔ لب میں‌ پریشاں تری آواز کا رنگ

بے پئے ہوں کہ اگر لطف کرو آخرِ شب

شیشۂ مے میں‌ ڈھلے صبح کے آغاز کا رنگ

یوں سجا چاند کہ جھلکا ترے انداز کا رنگ

فاعِلاتن فَعِلاتن فَعِلاتن فَعِلن

529

29 جولائی
نظم

فیض احمد فیض

گل ہوئی جاتی ہے افسردہ سلگتی ہوئی شام

دھل کے نکلے گی ابھی چشمۂ مہتاب سے رات

اور مشتاق نگاہوں کی سنی جائے گی

اور ان ہاتھوں سے مس ہوں گے یہ ترسے ہوئے ہاتھ

ان کا آنچل ہے، کہ رخسار، کہ پیراہن ہے

کچھ تو ہے جس سے ہوئی جاتی ہے چلمن رنگیں

گل ہوئی جاتی ہے افسردہ سلگتی ہوئی شام

فاعِلاتن فَعِلاتن فَعِلاتن فَعِلن

1289

29 جولائی
نظم

فیض احمد فیض

آج اک حرف کو پھر ڈھونڈتا پھرتا ہے خیال

مد بھرا حرف کوئی، زہر بھرا حرف کوئی

دلنشیں حرف کوئی، قہر بھرا حرف کوئی

حرفِ نفرت کوئی، شمشیرِ غضب ہو جیسے

تا ابد شہرِ ستم جس سے تباہ ہو جائیں

اتنا تاریک کہ شمشان کی شب ہو جیسے

آج اک حرف کو پھر ڈھونڈتا پھرتا ہے خیال

فاعِلاتن فَعِلاتن فَعِلاتن فَعِلن

461

29 جولائی
نظم

ن م راشد

سوچتا ہوں کہ بہت سادہ و معصوم ہے وہ

میں ابھی اس کو شناسائے محبت نہ کروں

روح کو اس کی اسیرِ غمِ الفت نہ کروں

اُس کو رسوا نہ کروں، وقفِ مصیبت نہ کروں

سوچتا ہوں کہ ابھی رنج سے آزاد ہے وہ

واقفِ درد نہیں، خوگرِ آلام نہیں

میں اُسے واقفِ الفت نہ کروں

فاعِلاتن فَعِلاتن فَعِلاتن فَعِلن

534

29 جولائی
غزل

مرزا غالب

نالہ جُز حسنِ طلب، اے ستم ایجاد نہیں

ہے تقاضائے جفا، شکوۂ بیداد نہیں

عشق و مزدوریِ عشرت گہِ خسرو، کیا خُوب!

ہم کو تسلیم نکو نامئ فرہاد نہیں

کم نہیں وہ بھی خرابی میں، پہ وسعت معلوم

دشت میں ہے مجھے وہ عیش کہ گھر یاد نہیں

نالہ جُز حسنِ طلب، اے ستم ایجاد نہیں

فاعِلاتن فَعِلاتن فَعِلاتن فَعِلن

640

29 جولائی
قطعہ

مرزا غالب

اے شہنشاہِ فلک منظرِ بے مثل و نظیر

اے جہاندارِ کرم شیوۂ بے شبہ و عدیل

پاؤں سے تیرے مَلے فرقِ ارادتِ ا ورنگ

فرق سے تیرے کرے کسبِ سعادت اِکلیل

تیرا اندازِ سُخَن شانۂ زُلفِ اِلہام

تیری رفتارِ قلم جُنبشِ بالِ جبریل

گزارشِ غالبؔ

فاعِلاتن فَعِلاتن فَعِلاتن فَعِلن

630

29 جولائی
نظم

مرزا غالب

چرخ تک دھوم ہے، کس دھوم سے آیا سہرا

چاند کا دائرہ لے، زہرہ نے گایا سہرا

رشک سے لڑتی ہیں آپس میں اُلجھ کر لڑیاں

باندھنے کے لیے جب سر پہ اُٹھایا سہرا

چرخ تک دھوم ہے، کس دھوم سے آیا سہرا

فاعِلاتن فَعِلاتن فَعِلاتن فِعْلن

348

29 جولائی
قطعہ

مرزا غالب

ہم نشیں تارے ہیں، اور چاند شہاب الدیں خاں

بزمِ شادی ہے فلک، کاہکشاں ہے سہرا

ان کو لڑیاں نہ کہو، بحر کی موجیں سمجھو

ہے تو کشتی میں، ولے بحرِ رواں ہے سہرا

ہم نشیں تارے ہیں، اور چاند شہاب الدیں خاں

فاعِلاتن فَعِلاتن فَعِلاتن فِعْلن

217

29 جولائی
غزل

مرزا غالب

خوش ہو اَے بخت کہ ہے آج تِرے سر سہرا

باندھ شہزادہ جواں بخت کے سر پر سہرا

کیا ہی اِس چاند سے مُکھڑے پہ بھلا لگتا ہے!

ہے تِرے حُسنِ دل افروز کا زیور سہرا

سر پہ چڑھنا تجھے پھبتا ہے پر اے طرفِ کُلاہ

مجھ کو ڈر ہے کہ نہ چھینے تِرا لمبر سہرا

خوش ہو اَے بخت کہ ہے آج تِرے سر سہرا

فاعِلاتن فَعِلاتن فَعِلاتن فِعْلن

732

29 جولائی
غزل

مرزا غالب

نکتہ چیں ہے ، غمِ دل اس کو سنائے نہ بنے

کیا بنے بات ، جہاں بات بنائے نہ بنے

میں بلاتا تو ہوں اس کو ، مگر اے جذبۂ دل

اس پہ بن جائے کُچھ ایسی کہ بن آئے نہ بنے

کھیل سمجھا ہے ، کہیں چھوڑ نہ دے ، بھول نہ جائے

کاش! یوں بھی ہو کہ بن میرے ستائے نہ بنے

نکتہ چیں ہے ، غمِ دل اس کو سنائے نہ بنے

فاعِلاتن فَعِلاتن فَعِلاتن فَعِلن

737

29 جولائی
غزل

مرزا غالب

ہر قدم دوریٔ منزل ہے نمایاں مجھ سے

میری رفتار سے بھاگے ہے ، بیاباں مجھ سے

درسِ عنوانِ تماشا ، بہ تغافل خوش تر

ہے نگہ رشتۂ شیرازۂ مژگاں مجھ سے

وحشتِ آتشِ دل سے ، شبِ تنہائی میں

صورتِ دود ، رہا سایہ گریزاں مجھ سے

ہر قدم دوریٔ منزل ہے نمایاں مجھ سے

فاعِلاتن فَعِلاتن فَعِلاتن فِعْلن

884

29 جولائی
غزل

مرزا غالب

نقشِ نازِ بتِ طناز بہ آغوشِ رقیب

پائے طاؤس پئے خامۂ مانی مانگے

تو وہ بد خو کہ تحیر کو تماشا جانے

غم وہ افسانہ کہ آشفتہ بیانی مانگے

وہ تبِ عشق تمنا ہے کہ پھر صورتِ شمع

شعلہ تا نبضِ جگر ریشہ دوانی مانگے

نقشِ نازِ بتِ طناز بہ آغوشِ رقیب

فاعِلاتن فَعِلاتن فَعِلاتن فَعِلن

654

29 جولائی
آزاد نظم

ن م راشد

اے جہاں زاد، نشاط اس شبِ بے راہ روی کی

میں کہاں تک بھولوں؟

زور ِ مَے تھا،

کہ مرے ہاتھ کی لرزش

تھی کہ اس رات کوئی جام گرا ٹوٹ گیا

تجھے حیرت نہ ہوئی!

حسن کوزہ گر نمبر 2

فاعِلاتن فَعِلاتن فَعِلاتن فِعْلن

2512

29 جولائی
قطعہ

مرزا غالب

ہے جو صاحب کے کفِ دست پہ یہ چکنی ڈلی

زیب دیتا ہے اسے جس قدر اچھّا کہیے

خامہ انگشت بہ دنداں کہ اسے کیا لکھیے

ناطقہ سر بہ گریباں کہ اسے کیا کہیے

مُہرِ مکتوبِ عزیزانِ گرامی لکھیے

حرزِ بازوئے شگرفانِ خود آرا کہیے

در مدح ڈلی

فاعِلاتن فَعِلاتن فَعِلاتن فِعْلن

573

29 جولائی
غزل

مرزا غالب

شکوے کے نام سے بے مہر خفا ہوتا ہے

یہ بھی مت کہہ کہ جو کہیے تو گلا ہوتا ہے

پر ہوں میں شکوے سے یوں، راگ سے جیسے باجا

اک ذرا چھیڑیے پھر دیکھیے کیا ہوتا ہے

گو سمجھتا نہیں پر حسن تلافی دیکھو

شکوۂ جور سے سر گرمِ جفا ہوتا ہے

شکوے کے نام سے بے مہر خفا ہوتا ہے

فاعِلاتن فَعِلاتن فَعِلاتن فِعْلن

882

29 جولائی
غزل

مرزا غالب

نہ ہوئی گر مرے مرنے سے تسلی نہ سہی

امتحاں اور بھی باقی ہو تو یہ بھی نہ سہی

خار خارِ المِ حسرتِ دیدار تو ہے

شوق گل چینِ گلستانِ تسلّی نہ سہی

مے پرستاں خمِ مے منہ سے لگائے ہی بنے

ایک دن گر نہ ہوا بزم میں ساقی نہ سہی

نہ ہوئی گر مرے مرنے سے تسلی نہ سہی

فاعِلاتن فَعِلاتن فَعِلاتن فَعِلن

789

29 جولائی
غزل

مرزا غالب

حسنِ مہ گرچہ بہ ہنگامِ کمال اچھا ہے

اس سے میرا مہِ خورشید جمال اچھا ہے

بوسہ دیتے نہیں اور دل پہ ہے ہر لحظہ نگاہ

جی میں کہتے ہیں کہ مفت آئے تو مال اچھا ہے

اور بازار سے لے آئے اگر ٹوٹ گیا

ساغرِ جم سے مرا جامِ سفال اچھا ہے

حسنِ مہ گرچہ بہ ہنگامِ کمال اچھا ہے

فاعِلاتن فَعِلاتن فَعِلاتن فَعِلن

645

29 جولائی
نظم

پروین شاکر

آج کی شب تو کسی طور گُزر جائے گی

رات گہری ہے مگر چاند چمکتا ہے ابھی

میرے ماتھے پہ ترا پیار دمکتا ہے ابھی

میری سانسوں میں ترا لمس مہکتا ہے ابھی

میرے سینے میں ترا نام دھڑکتا ہے ابھی

زیست کرنے کو مرے پاس بہت کُچھ ہے ابھی

آج کی شب تو کسی طور گُزر جائے گی

فاعِلاتن فَعِلاتن فَعِلاتن فِعْلن

1961