| ثانی تو اپنے دل کو کچھ تھام رفتہ رفتہ |
| الفت کے روگ سے ہو آرام رفتہ رفتہ |
| اس شوخ میں ہے خوبی کہ مجھ کو دے رہا ہے |
| سودے کے بعد بوسہ انعام رفتہ رفتہ |
| صحبت اٹھائی ہم نے کچھ شوخ خوبرو کی |
| کہتے ہیں تم بھی ہو گے گلفام رفتہ رفتہ |
| پہلے تو نیک نامی تھی قدسیوں میں میری |
| پھر کر گئی ہے الفت بدنام رفتہ رفتہ |
| پہلو میں میرے آ کے پھر لکھ گئی تباہی |
| پھر شب گزیدہ ہوگی یہ شام رفتہ رفتہ |
| پیدا ہوئے تو دنیا یکسر لگی کمینی |
| دل کش ہوا فریبِ ایام رفتہ رفتہ |
| پھر وہ شرارِ الفت شعلہ سا ہو رہا ہے |
| پھر شہرِ دل میں برپا کہرام رفتہ رفتہ |
| دار و رسن کے آگے چلتا نہیں بہانہ |
| ناکامیٔ جنوں سے لے کام رفتہ رفتہ |
| خوابیدہ سے ذرے بیدار ہو رہے ہیں |
| آوارگی ہماری ہے عام رفتہ رفتہ |
| دو روح کی دو سانسیں آپس میں مل رہی ہیں |
| پھر لب سے لگ رہے ہیں یہ جام رفتہ رفتہ |
| اس مرحلے میں ثانی تشدید لازمی ہے |
| دو جسم کا جو ہوگا ادغام رفتہ رفتہ |
| پہلے تو میری شاں میں کیا کیا قصیدے لکّھے |
| اب دے رہے ہو مجھ کو دشنام رفتہ رفتہ |
معلومات