| شبِ تنہائی میں دل میں تمہیں ہم نے اتارا ہے |
| غمِ دوراں کے طوفاں میں خدا کا ہی سہارا ہے |
| ہماری بے خودی پر بے رخی سے وار مت کیجے |
| محبت کے تقاضوں نے ہمیں جاں سے گزارا ہے |
| نہ جانے کس خطا پر ہو گئیں برہم سبھی نظریں |
| تمہاری یاد کا ہر غم، ہمیں دل سے گوارا ہے |
| نہ کوئی نوحہ ہونٹوں پر، نہ آنکھوں میں نمی کوئی |
| زمانے کا دیا ہر درد اللہ نے سنوارا ہے |
| سمندر تشنہ کامی کا، نہ جانے کون ساحل ہو |
| سفر تاریک ہے لیکن افق پر اک ستارا ہے |
| وفا کی رہگزر میں جو لٹا وہ جیت جائے گا |
| خدا کا ساتھ مل جائے تو پھر کیسا خسارا ہے |
| تمہیں اب کون چاہے گا بھلا عادلؔ کی صورت یوں |
| جسے ٹھکرا کے تم نے آج غیروں کو پکارا ہے |
معلومات