| * غزل * |
| شیریں و فرہاد و خسرو اور جوئے شیر، خواب |
| داستانِ لیلیٰ مجنوں، قیس، رانجھا ہیر، خواب |
| نیند سے بوجھل ہیں پلکیں اور ہیں تحریر خواب |
| جانے کیا دکھلائیں، دیکھیں صبح دم، تعبیر، خواب |
| ہر ورق پڑھتی رہیں آنکھیں کتابِ ہجر کا |
| برسرِ نوکِ مژہ کرتے رہے تشہیر، خواب |
| یہ مری شہ رگ ہے، میری جان، دنیا جان لے |
| جاگتی جیتی حقیقت ہے، نہیں کشمیر، خواب |
| بیج خوشیوں کا کبھی بویا الٹ تعبیر نے |
| اور شجر کاری کبھی کرتے رہے دلگیر خواب |
| روز اک چہرہ سجایا ہے سرِ مژگانِ چشم |
| روز دکھلاتے ہیں اک بدلی ہوئی تصویر، خواب |
| اصغرِ معصوم کی صورت میں خالی گود کو |
| جاگتے میں دیکھتی ہے مادرِ بےشیر خواب |
| خامہءِ صد رنگ کے بھی تُو کبھی جوہر دکھا |
| لکھ دھنک رنگوں سے بھی اے کاتبِ تقدیر، خواب |
| آنکھ کھلتے ہی میں شہزادہ وہ شہزادی نہ تھی |
| تھے ہوا جو بھی محل کرتے رہے تعمیر خواب |
| ساتھ ہم دونوں نے جو لمحے گزارے تھے کبھی |
| اُن حسیں لمحوں کی ہیں تھامے ہوئے زنجیر، خواب |
| جب سے خسرو کو ہوا لاحق جنونِ عاشقی |
| رکھ کے پہلو میں وہ دیکھے ہے بیاضِ میر، خواب |
| (فیروز ناطق خسروؔ) |
| (20-08-2020) |
معلومات