| مرے شاعر |
| ثنائے حسن کے شیدا |
| رواں تیری زباں پر ہیں |
| مری تعریف کے جملے |
| کہیں یہ تذکرہ ہے پھر |
| مری زلفوں کی رنگت میں |
| گھٹاؤں کی سیاہی ہے |
| مری آنکھیں ہیں یوں جیسے |
| شرابوں کے کٹورے ہیں |
| مرے گالوں کی سرخی تو |
| شفق کے رنگ جیسی ہے |
| مرے ہونٹوں کی ٹہنی پر |
| گلابوں کا بسیرا ہے |
| مگر یوں ہے مرے شاعر |
| تیرے فن کی رسائی تو |
| مرے اجلے بدن تک ہے |
| مرے اندر کی تاریکی |
| بھلا کب تو نے دیکھی ہے |
| مگر یوں ہے مرے شاعر |
| تیرے فن کی زمینوں میں |
| مرے جذبات کے مدفن پہ رکھی ہے |
| ترے الفاظ کی چادر |
| حسیں الفاظ کی چادر |
| انہی لفظوں کی بجلی نے |
| چمک کے کر دیا اندھا |
| مرے حساس لوگوں کو |
| بھلا اب کون دیکھے گا |
| مرے ناسور زخموں کو |
| مری سسکی کو آہوں کو |
| بھلا اب کون دیکھے گا |
| مری زلفوں کی رنگت میں |
| گھٹاؤں کی نہیں میرے |
| مقدر کی سیاہی ہے |
| مرے گالوں کی سرخی تو |
| زمانے کے طمانچوں کے سبب سے ہے |
| مرے ہونٹوں کی ٹہنی پر |
| تو کوئی بھی گلاب نہیں |
| مرے شاعر مری آنکھوں میں |
| آنسو ہیں شراب نہیں |
معلومات