| چوٹ دل کی بہت پرانی ہے |
| رت ہوا کی مگر سہانی ہے |
| آنکھ روشن چراغ کی مانند |
| آرزو دل کی جاودانی ہے |
| سارے کردار غم اٹھاتے ہیں |
| کیا عجب عشق کی کہانی ہے |
| پھر کوئی موج دل سے ٹکرائی |
| ساحل چشم پانی پانی ہے |
| کوئی پوچھے تو کیا بتائیں ہم |
| بچپنا کیا تھا کیا جوانی ہے |
| اب اسے کیا سنبھال کر رکھنا |
| ریت مٹھی کی زندگانی ہے |
| ظرف والے ہی اہل ہیں اس کے |
| غم کہانی تو خاندانی ہے |
| جاگتا ہوں کہ نیند آتی نہیں |
| کیسے خوابوں کی رائیگانی ہے |
معلومات