| اس کا ضمیر لفظ کے سانچوں میں ڈھل گیا |
| کہنے کو تھا وہ جھوٹ منہ سے سچ نکل گیا |
| شیطان حسن اوڑھ کے آیا تھا بار بار |
| پڑھ کر کتاب عشق کی میں بھی سنبھل گیا |
| لمبی اندھیری رات میں تارے نہ رہ سکے |
| نکلا جو چاند پھر تو نہیں ایک پل گیا |
| ہم نے تو سر اُٹھا کے یوں دیکھا نہ تھا کبھی |
| اس پر نظر پڑی تو جیسے دل مچل گیا |
| کچھ ہم سے بات کرنے کی جرات نہیں ہوئی |
| اس کے بھی کچھ مزاج کا موسم بدل گیا |
| اتنی کڑی تھی دھوپ مرے سر پہ ہجر کی |
| سایہ بھی ساتھ چھوڑ کے پہلو میں جل گیا |
| بارش تھی کب سے آنکھ کے اندر تھمی ہوئی |
| دیکھا تجھے تو ضبط کا تختہ پھسل گیا |
| دیکھا نہ ہم نے کوئی بھی ٹھہرا جہان میں |
| جس کو بلاوہ آ گیا وہ سر کے بل گیا |
| طارق ترے بغیر بھی ہے کارواں رواں |
| دنیا کا کام کونسا ہے جو کہ ٹل گیا |
معلومات