| بسمِ خدا، بہ نامِ شہِ کشورِ وفا |
| سلطانِ کربلا، شہِ اقلیمِ کبریا |
| وہ مطلعِ تجلیِ وہ نورِ با کمال |
| وہ مصطفٰی کا ہم نوا وہ فاطمہ کا لال |
| وہ بحرِ بے کراں سا مگر صبرِ لازوال |
| جس کی جبیں پہ ثبت تھا منشورِ ذوالجلال |
| تقدیرِ حق نے پیکرِ کردارِ حق کہا |
| اسلام نے اسے سپہ سالارِ حق کہا |
| جب ابرِ جور چھا گیا آفاقِ روزگار |
| جب ظلم نے پہن لیا زرّیں لباسِ عار |
| جب تختِ کفر نے کیا شفقت کو تار تار |
| جب عدل ڈھونڈتا تھا کوئی صاحبِ وقار |
| تب دشتِ کربلا میں وہ مردِ یقیں اُٹھا |
| حق کا چراغ لے کے وہ روشن جبیں اٹھا |
| وہ ایک فرد، سامنے مردانِ بے حساب |
| لیکن نہ دل میں ڈر تھا کوئی اور نہ اضطراب |
| پیشِ نظر تھی رب کی رضا مدّعا ثواب |
| لب پر دعائے خیر تھی اور دل میں تھی کتاب |
| شمشیرِ ظلم سامنے، چہرے پہ نور تھا |
| گویا زمین پر کوئی پیغامِ طور تھا |
| بحرِ فرات اپنی روانی پہ شرم سار |
| جو سوگوار تھی ہوا موجیں بھی اشک بار |
| صحرا میں جل رہا تھا شہنشاہِ روزگار |
| لیکن لبِ حسینؑ پہ کوئی نہ تھی پکار |
| پیاسے تھے اہلِ بیت، وہ تنویرِ صبر دیکھ |
| سجدوں میں ڈھل رہی تھی جو تفسیرِ صبر دیکھ |
| پہنچے شطِ فرات پہ عباسِ با وقار |
| ٹھہری ہوئی تھی موج بھی لے کر دلِ فگار |
| دریا کے دل میں اٹھنے لگی حسرتِ بہار |
| گویا اسے بھی تھا شہِ والا کا انتظار |
| ہر موج سر جھکائے ادب سے کھڑی ہوئی |
| فرزندِ بو تراب کی آمد بڑی ہوئی |
| اکبرؑ گرے تو کانپ اٹھی ساری کائنات |
| قاسمؑ کی لاش دیکھ کے روئے تھے شش جہات |
| عباسؑ کی وفا پہ ہوئی دو جہاں میں بات |
| زینبؑ کے صبر پر ہوئے حیران ممکنات |
| لیکن امامِ صبر کے لب پر یہی رہا |
| جو ہے خدا کی مرضی تو ، بہتر یہی رہا |
| جب وقتِ عصر آیا، عجب رنگِ راز تھا |
| ہر ذرّہ محوِ دید، فلک محوِ ناز تھا |
| عرشِ بریں پہ عالمِ بالا گداز تھا |
| گویا خدا کا قرب تو مخفی نماز تھا |
| سجدے میں سر جھکا تو زمیں عرش ہو گئی |
| قربانی تیری اب تو سوئے فرش ہو گئی |
| کٹ کے بھی سر بلند تھا وہ تختِ دار پر |
| قرآن ہی رواں تھا لبِ شہسوار پر |
| حیران تھے ملائکِ عرشِ وقار پر |
| کیسا جلال چھا گیا دشتِ غبار پر |
| قاتل بھی جس کے نور سے لرزاں دکھائی دے |
| خورشید بھی غبار میں پنہاں دکھائی دے |
| وہ سر نہیں تھا، آیتِ تفسیرِ کبریا |
| وہ خوں نہیں تھا، چشمۂ تطہیرِ کبریا |
| وہ صبر تھا کہ جس میں ہے تنویرِ کبریا |
| وہ مظہرِ رضا تھی یا تقدیرِ کبریا |
| اسلام کو ابھی اسی احساں پہ ناز ہے |
| شبیرؑ کا لہو ہی دیں کا اعتزاز ہے |
| تخت و کلاہ والوں کا دربار کٹ گیا |
| ہر شوکتِ ستم کا نشاں تک سمٹ گیا |
| جو ظلم پر بنا تھا وہ تختہ اُلٹ گیا |
| حق کے سوا جو کچھ بھی تھا ٹکڑوں میں بٹ گیا |
| باطل کی سلطنت کا فقط اک غبار ہے |
| شبیرؑ کا وقار مگر برقرار ہے |
| ہر دور کے یزید کو پیغام مل گیا |
| آئینۂ حیات کو اِلہام مل گیا |
| آزاد فکر کو یہاں افہام مل گیا |
| انسان کو ضمیر کا انعام مل گیا |
| کرب و بلا کی خاک نے یہ معجزہ کیا |
| مردہ دلوں کو زندہ و جاوید کر دیا |
| اے سالکِ طریقِ وفا! مانگ لو یہاں |
| اے طالبِ رضائے خدا !مانگ لو یہاں |
| اے تشنۂ حیاتِ بقا! مانگ لو یہاں |
| اے طالبِ فروغِ ضیا! مانگ لو یہاں |
| اِس در سے ملتی آج بھی عرفان کی شراب |
| اِس در سے کھلتے آج بھی اسرار کے حجاب |
| یا رب! ہمیں بھی اُن کے غلاموں میں کر شمار |
| بخشش ہو اُن کے صدقے میں روزِ حساب یار |
| محشر میں ہو نصیب وہی سایۂ وقار |
| جس کے لیے ترستے ہیں افلاک بے شمار |
| ہم پر بھی ایک بار کرم کی نظر رہے |
| شبیرؑ کا غلام رہے، عمر بھر رہے |
معلومات