| تحریر: ندیم احمد زیدی |
| دنیا کے رنگین مناظر، چمکتے چہرے اور دلکش لہجے بظاہر کسی بھی رشتے کو خوبصورت بنا سکتے ہیں، مگر جب بات دیرپا اور سچے رشتے کی ہو تو صرف خوبصورتی کافی نہیں ہوتی۔ ایک پائیدار اور مضبوط رشتہ صرف وفاداری کے سہارے قائم رہتا ہے۔ خوبصورتی وقت کے ساتھ ماند پڑ جاتی ہے، مگر وفاداری ایک ایسا جوہر ہے جو وقت گزرنے کے ساتھ مزید نکھرتا ہے، مضبوط ہوتا ہے اور رشتے کو اصل معنوں میں خوبصورت بناتا ہے۔ |
| انسان کی فطرت ہے کہ وہ دلکش چیزوں کی طرف مائل ہوتا ہے۔ ہمیں چہرے کی کشش، بول چال کی نرمی اور ظاہری حسن بہت متاثر کرتا ہے۔ یہی چیزیں ہمیں کسی کے قریب لے جاتی ہیں۔ لیکن جیسے ہی وقت گزرتا ہے، ان ظاہری چیزوں کی چمک دمک کم ہونے لگتی ہے۔ تب ہمیں احساس ہوتا ہے کہ رشتہ اصل میں کس بنیاد پر کھڑا تھا۔ اگر بنیاد وفاداری پر تھی، تو وہ رشتہ وقت کے تھپیڑوں میں بھی قائم رہتا ہے۔ لیکن اگر صرف خوبصورتی پر تھا، تو وہ ریت کی دیوار ثابت ہوتا ہے، جو پہلی آندھی میں گر جاتا ہے۔ |
| وفاداری صرف جسمانی تعلق کا نام نہیں، یہ دل و دماغ کی ہم آہنگی، احساس کی سچائی، اور موجودگی کی غیر مشروطی کا نام ہے۔ یہ وہ طاقت ہے جو فاصلے کو مٹاتی ہے، غلط فہمیوں کو دور کرتی ہے، اور مصیبت کے وقت ایک دوسرے کا سہارا بنتی ہے۔ وفاداری کا مطلب یہ بھی ہے کہ ہم اپنے رشتے کو دوسروں کی نظروں سے نہیں، بلکہ اپنے دل کی گہرائی سے دیکھیں۔ ہم دوسروں کی چمک میں اپنے پرانے رشتوں کو نہ بھولیں، نہ نظر انداز کریں۔ |
| آج کے دور میں، جہاں سوشل میڈیا نے ہماری ترجیحات بدل دی ہیں، ہم ظاہری خوبصورتی کو ہی سب کچھ سمجھ بیٹھے ہیں۔ ہمیں لگتا ہے کہ جو نظر آ رہا ہے وہی اصل ہے۔ مگر اصل وہ ہے جو نظر نہیں آتا، جو دل کے اندر بسا ہوتا ہے۔ کسی کی آنکھوں میں سچائی، باتوں میں خلوص اور عمل میں وفاداری ہو تو وہ شخص لاکھ سادہ ہو، لیکن اس کے ساتھ جڑا رشتہ دنیا کا سب سے حسین رشتہ ہوتا ہے۔ |
| رشتوں میں خوبصورتی ہو تو اچھی بات ہے، لیکن اگر وفاداری نہ ہو تو وہ خوبصورتی جلد ہی بے معنی ہو جاتی ہے۔ ہم سب کو یہ سمجھنا ہوگا کہ خوبصورتی وقتی ہے، لیکن وفاداری دائمی ہے۔ ایک وفادار انسان نہ صرف رشتے کو سنوار دیتا ہے، بلکہ ہماری زندگی کو سکون سے بھر دیتا ہے۔ |
| لہٰذا، جب بھی کسی رشتے کو پرکھنا ہو، تو اس کے چہرے کے نقوش نہیں، اس کے دل کی گہرائی دیکھیے۔ کیونکہ اصل خوبصورتی وفاداری میں ہے، اور یہی رشتوں کو جِلا دیتی ہے۔ |
| یاد رکھیں، رشتہ صرف تبھی نبھتا ہے جب دونوں طرف سے سچائی، خلوص اور وفاداری ہو۔ ظاہری خوبصورتی کو معیار بنانے کے بجائے، وفاداری کو اپنی زندگی کا اصول بنائیے۔ کیونکہ خوبصورتی دھوکہ دے سکتی ہے، مگر وفاداری ہمیشہ سچائی پر قائم رہتی ہے۔ |
معلومات