| آئے ہیں ستم گر بھی مخمل کی ردا اوڑھے |
| چپ چاپ کھڑے ہیں ہم چہرے پہ فنا اوڑھے |
| گونگوں کی عدالت میں ہم کس کو بتاتے غم! |
| خاموش کھڑے تھے سب ہونٹوں پہ صدا اوڑھے |
| ہونٹوں پہ تبسم ہے بغل میں ہے چھپا خنجر |
| ظالم ہیں گلے ملتے زہریلی وفا اوڑھے |
| آنکھوں میں سلگتے ہیں یادوں کے گھنے جنگل |
| اور خواب ٹھٹھرتے ہیں پت جھڑ کی ہوا اوڑھے |
| دربارِ ستم گر میں اعلانِ بغاوت ہے |
| راجا ہے زرہ اوڑھے درویش دعا اوڑھے |
| المیرؔ محبت کی بس اتنی حقیقت ہے |
| اک عمر گزاری ہے ہم نے یہ سزا اوڑھے |
معلومات