| جھاڑیوں کی اوٹ میں پچھلے پہر کا آفتاب |
| جیسے مفلس کا بڑھاپا جیسے بیوہ کا شباب |
| دور صحرا میں کسی رہرو کو پانی کی تلاش |
| رات کی ڈھلتی جوانی بدلیوں میں ماہتاب |
| تنگدستی کی گھٹن سے زخم خوردہ نازنیں |
| اور پھر حجرے کے اندر مستیاں کارِ ثواب |
| جھونپڑی کے سامنے اوباش لڑکوں کا ہجوم |
| خوبرو الھڑّ دوشیزہ آرزوؤں کا سراب |
| میکدے میں شیخ صاحب کا بیانِ دلنشیں |
| اور کونے میں کہیں اک اور بھی عزّت مآب |
| تخلیہ بہتر ہے یا لالہ رخوں کی محفلیں |
| عہدِ گم گشتہ کے سپنے جاگتی آنکھوں کے خواب |
| بیچ ڈالا خرقۂ اسلاف کو بازار میں |
| اب نہیں ممکن کبھی آئے پرانا انقلاب |
| نہ کسی آئین کا قانون کا طاری ہو خوف |
| اپنا ایماں اپنا قرآں اپنا اپنا احتساب |
| ہر طرف اتنا تفاوت ہے کہ دل ہوتا ہے خوں |
| کون جانے ختم کب ہوگا طبیعت کا عذاب |
| اپنی اپنی کوششوں کے سب مکلفّ ہیں امید |
| وقت بیتا جا رہا ہے آلگا یومِ حساب |
معلومات