| راہ گیروں کو یہ امکان کہاں ہوتا ہے |
| راستہ کوئی بھی آسان کہاں ہوتا ہے |
| ابن آدم تو نظر آتا ہے بستی بستی |
| کچھ پتہ کیجیے کہ انسان کہاں ہوتا ہے |
| آندھیاں دیکھی ہیں سیلاب و تلاطم دیکھے |
| دل کے اندر ہے جو طوفان کہاں ہوتا ہے |
| دیش پر جان لٹا دینگے فقط کہتا ہے |
| رہنما کوئی بھی قربان کہاں ہوتا ہے |
| نام مسلم ہے سو اسلام میں داخل کہۓ |
| ہر بشرصاحب ایمان کہاں ہوتا ہے |
| وقت کی قید جدا ہونا پڑے گا ورنہ |
| میری خواہش مرا ارمان کہاں ہوتا ہے |
| کس کا گھر ٹوٹے گا کل دیکھۓ ازہر صاحب |
| اب تو نوٹس کوئی اعلان کہاں ہوتا ہے |
معلومات