| لے کے بیٹھا قلم تھا پرانی روِش |
| کوند جائے خیالات کی اِک تپش |
| لفظ پہلا جو لکھا تو پوچھا کیے |
| کیسے زندان خانے میں پَل پَل جیے |
| نکلیں زندان خانے سے جائیں کہاں |
| وادیوں کی طرف! کچھ بتا جانِ جاں |
| یا جگہ وہ بتا ، ہو جو محفوظ بھی |
| دل معطر کرے اور محظوظ بھی |
| مدتوں سے وہاں خوف و خطرہ نہ ہو |
| بحرِ رنج و الم کا بھی قطرہ نہ ہو |
| آدمی ، آدمی کو نہ نوچے وہاں |
| راہِ اغیار کا ہو نہ کوئی نشاں |
| بغض ، کینہ نہ ہو ، نا عداوت کا غم |
| دل میں اٹھے خلش ، نا بغاوت کا غم |
| چاند راتوں میں تاروں بھری رات ہو |
| چاند اُترے زمیں پر ، تری بات ہو |
| بات ایسی جو کانوں میں رس گھول دے |
| روحِ مضطر کی ہر اِک گرہ کھول دے |
| خامشی ہر طرف سے ہو چھائی ہوئی |
| بادِ فرحت تبسّم ہو لائی ہوئی |
| بھینی بھینی مہک ، تیری آغوش ہو |
| وقت تھم جائے عالَم بھی خاموش ہو |
| زُلفِ خم دار لہرائے رخسار پر |
| مسکراتی رہے طرزِ گفتار پر |
| تو جو بولے چمن بھی ہو نغمہ سرا |
| اور بلبل بھی کہتا پھرے مَن کُجا |
| کیف و مستی کا منظر کروں کیا بیاں |
| ہوگا خُلدِ بریں جیسا دل کش سماں |
| دل کی دھڑکن سے پیدا ہوا ساز جو |
| اس نے افشاں کیا دفن تھا راز جو |
| نسل در نسل اک یہ حراست ملی |
| دولتِ عشق مجھ کو وراثت ملی |
| اس وراثت کے ہم ہی نگہباں ہوئے |
| یعنی دشتِ صحارا کے مہماں ہوئے |
| آؤ رسمِ وفا کو نبھاتے چلیں |
| سب قرینے جفا کے مٹاتے چلیں |
| راہِ الفت پہ چلتے نہ ہاریں گے ہم |
| آخری سانس تک جان واریں گے ہم |
| کوئی دنیا میں ایسی بتا سر زمیں |
| جانِ جاں جس کے ہو جائیں ہم بھی مکیں |
| یوں خیالی پلاؤ پکاتا ہوں میں |
| نقشِ بے کار اکثر بناتا ہوں میں |
| میری سوچی ہوئی سر زمیں بھی کہیں |
| مجھ کو ایسے لگا اِس جہاں میں نہیں |
| جسم و جاں میں تھی ہلکی سی اک جو رمق |
| اس کا اب تک ہے مجھ کو بَلا کا قلق |
| جب کھلی آنکھ دل تو گیا ہی پھڑک |
| میرے گونجے تھے نالے زمیں تا فلک |
| خواب ہی خواب میں تھی کہانی بُنی |
| دل گرفتہ نے دنیا کی کیا ناں سُنی |
| جس نے دھندلا دیا عکسِ محبوب کو |
| لے چلو گاہِ مقتل پہ مجذوب کو |
| یوں قلم رات ، دن مَیں چلاتا رہوں |
| دل لُبھاتا رہوں ، گیت گاتا رہوں |
| سوزِ دل کو سحر سازِ مضراب دے |
| خوابِ رنگین کو ایک مہتاب دے |
معلومات