| طوفان میں یقیں کے سفینے بچے رہیں |
| یارب مرے جنوں کے دفینے بچے رہیں |
| لٹ جائے سب متاعِ جہاں، کوئی غم نہیں |
| دل میں مرے خلوص کے خزینے بچے رہیں |
| صحرا میں تشنگی کے سہے وار اس لیے |
| پیاسے رہیں، وفا کے قرینے بچے رہیں |
| بازار میں ہوس کے خریدار ہیں بہت |
| اس بھیڑ میں حیا کے نگینے بچے رہیں |
| کٹ جائے سنگلاخ چٹانوں پہ زندگی |
| چہرے پہ جستجو کے پسینے بچے رہیں |
| تاریک گر ہے ہجر کی شب، کوئی غم نہیں |
| یادوں میں قربتوں کے مہینے بچے رہیں |
| المیرؔ مٹ بھی جائے یہ دنیا تو غم نہیں |
| آباد بس یہ دل کے مدینے بچے رہیں |
معلومات