| سنو |
| مری جان اک بات کہنی ہے تم سے |
| مرا دل کہیں کھو گیا ہے |
| ملے تو بتانا |
| کسی نے کہا ہے |
| تمھاری گلی میں وہ دیکھا گیا ہے |
| تمھاری گلی سے محبت تھی اس کو |
| وہ شاید وہیں بھاگ نکلا |
| وہ ایسا ہی کرتا ہے اکثر |
| تمھاری طلب میں مگن ہے وہ ہر دم |
| ہے مشتاق وہ بس تمھاری نظر کا |
| ملے تو بتانا |
| اگر ہو سکے تو گلے سے لگانا |
| سنو! |
| دھڑکتا ہے وہ نام سن کے تمھارا |
| شب و روز رہ دیکھتا ہے تمھاری |
| تمھاری گلی کی وہ لپٹا ہو گا خاک سے |
| وہ اکثر ایسا ہی کرتا ہے |
| سنو |
| تمھارے بس اک لمس کا منتظر رو رہا ہوگا شاید |
| ملے تو اسے تم اٹھانا |
| اسے نرم ہاتھوں سے بس تھپ تھپانا |
| خیال اس کا رکھنا |
| خیال اس کا رکھنا |
| کبھی تو وہ دل میرا ہی تھا |
| مگر اب تمھارا ہوا |
| خیال اس کا رکھنا |
| خیال اس کا رکھنا |
معلومات