| کیا درد کا دل میں کس نے چراغاں |
| ہوئی رہ گزر عشق کی جس سے آساں |
| چمن میں ہو رنگیں بہاروں کی خوشبو |
| تو سینچا گیا خونِ دل سے گلستاں |
| ازل سے ہے تقدیر کی یہ روایت |
| محبت ہے اکسیرِ زہرِ رگِ جاں |
| تری یاد رگ رگ میں بہنے لگی ہے |
| کہ آتش لہو کی بنی ہے تپِ جاں |
| دعا مانگتی ہے مری چشمِ خستہ |
| کوئی خواب شب بھر ہو میرا نگہباں |
| جو تسبیح میں لفظ گننے میں آئے |
| وہ الفاظ کب تھے توجّہ کے خواہاں |
| بدن ہو کہیں دل کہیں اور اٹکے |
| خیالوں سے ایسے رہا ہوں گریزاں |
| ترے بعد دل کی صدا رک گئی ہے |
| نہ آہیں نہ نبضیں نہ سانسیں پریشاں |
| ترے عشق کا دعویٰ جھوٹا ہے طارق |
| ابھی تک نہیں چاک تیرا گریباں |
معلومات