| میں نے کچھ کہا ہے کیا ؟ |
| تو نے کچھ سنا ہے کیا ؟ |
| نظریں پھیرتا ہے کیوں |
| تو بھی بے وفا ہے کیا ؟ |
| گھر رہوں تو کس لئے ؟ |
| گھر میں کچھ بچا ہے کیا ؟ |
| پڑھتے کیوں نہیں اسے ؟ |
| خط میں کچھ لکھا ہے کیا ؟ |
| چپ ہو کیوں ارے میاں |
| حادثہ ہوا ہے کیا ؟ |
| تیرا حوصلہ ہوں میں |
| میرا حوصلہ ہے کیا ؟ |
| بے کسوں کے واسطے |
| کوئی آسرا ہے کیا ؟ |
| منکرِ خدا بتا ؟ |
| تیرا بھی خدا ہے کیا ؟ |
| عشق لا علاج ہے |
| عشق کی دوا ہے کیا ؟ |
| اس کے در پہ رات دن |
| اب تلک پڑا ہے کیا ؟ |
| تیری یہ وفا ہے تو |
| پھر بتا جفا ہے کیا ؟ |
معلومات