| چاند پلکوں پہ لیے دھوپ کنارہ کرتے |
| جلتے موسم کی فضا کیسے گوارہ کرتے |
| کھینچ لاتے کسی بادل کو برسنے کے لیے |
| وہ جو حدت میں کھڑے ہم کو اشارہ کرتے |
| ہم کڑی دھوپ کو چھاؤں کا سہارا دیتے |
| بجھتے سورج کا سرِ عام نظارہ کرتے |
| ہالہ آنکھوں کے فلک سے تجھے تکتا رہتا |
| ہم تجھے چاند کی سنگت میں ستارہ کرتے |
| ہم نہ ہوتے کبھی نادم نہ ہی شکوہ کرتے |
| عشق غلطی ہے تو یہ غلطی دوبارہ کرتے |
| ہم ترے نام کو سنتے ہی بھڑک سے جاتے |
| ہم ترے نام کو جل جل کے شرارہ کرتے |
| ہم نے دنیا میں ہی جنت کا مزہ لوٹ لیا |
| ہم ترے ساتھ نہ ہوتے تو خسارہ کرتے |
معلومات