| رات کے پچھلے پہر چپ چاپ سرکتے لمحے |
| چاند انگڑائی لئے جانے کی رخصت چاہے |
| پرندے جاگے |
| تازہ دم روشنی بام افق پر پھیلی |
| لان میں بکھری ہوئی رات کی رانی مہکی |
| پتیوں پہ چمکتی ہوئی شبنم دمکی |
| بام و در پہ سجی بیلوں کے لہکتے جھمکے |
| راہداری میں بچھے پتوں کا خوش رنگ جمال |
| روح پہ کیف کی رم جھم لگے برسانے |
| زندگی خود پہ لگی اترانے |
| میں نے زینے سے اتر کر ، تیرے کمرے کی طرف |
| خود بخود دیکھے بنا سوچے بنا رخ موڑا |
| سال ہا سال کی راسخہ عادت کے سبب |
| تیرے پُرنور محبت سے سجے چہرے کا تصور لے کر |
| میں نے آداب کہا۔۔۔ |
| دل سے اک ہوک اٹھی ، جھٹکا لگا ، آنکھ سے آنسو چھلکے |
| کپکپا اٹھا درد سے یک لخت وجود |
| وائے حسرت ! |
| "جائیت خالی بود" |
| (دسمبر 2025 کی ایک یاد) |
معلومات