| سکونِ قلب اطمینان پایا |
| خدا کا ہم نے جب وجدان پایا |
| ہماری زیست کا مقصد عبادت |
| خدا کا تو یہی فرمان پایا |
| خدا کے ذکر سے لب ہیں معطّر |
| ہے جب سے قلب نے عرفان پایا |
| جو کی خلقِ خدا پر ہم نے شفقت |
| تو اس کے حق میں سب قرآن پایا |
| اگر بانٹیں کسی کو ہم نے خوشیاں |
| مسرّت کا ہے خود سامان پایا |
| نہیں ہے گر عمل باتیں فقط ہیں |
| تعلّق پھر فقط بے جان پایا |
| نہیں ممکن محبّت ہم کریں پر |
| وہ اب تک یہ نہ ہو پہچان پایا |
| کٹھن ہوتی ہیں سب نیکی کی راہیں |
| چلے تو ہر قدم شیطان پایا |
| بلندی پر اگر اپنی ہو منزل |
| ہے کس نے راستہ آسان پایا |
| عجب حسن و محبّت کی کہانی |
| کہ زنداں میں مہِ کنعان پایا |
| خزانے اشک بن کر دل سے نکلے |
| جو موتی کو سرِ مژگان پایا |
| اسی ظالم سے دردِ دل ملا تھا |
| اسی سے درد کا درمان پایا |
| نہ بخشے ہم گئے تو فائدہ کیا |
| اگر قسمت سے ہے رمضان پایا |
| جو بیٹھے صحبتِ صادق میں طارق |
| وہیں سے ہم نے سب فیضان پایا |
معلومات