| میں نے اپنے غم کا افسانہ لکھا ہے عید پر |
| درد سے بھرپور اک نغمہ لکھا ہے عید پر |
| مسکراہٹ کو مری شاید نظر سی لگ گئی |
| یا مری قسمت میں ہی رونا لکھا ہے عید پر |
| اب نہ آئے گی تمہاری یاد مجھ کو پھر کبھی |
| کانپتے ہاتھوں سے یہ جملہ لکھا ہے عید پر |
| غور سے آنکھوں کو دیکھا اور مری مسکان کو |
| اک فقیرِ شہر نے گریہ لکھا ہے عید پر |
| سادگی اتنی ہے مجھ میں باوجود انکار کے |
| میں نے خود کو ہِیر کا رانجھا لکھا ہے عید پر |
| لکھ رہی تھی ساری دنیا گیت خوشیوں کے مگر |
| دیکھ لو مرحوم نے نوحہ لکھا ہے عید پر |
| حسن رازق مرحوم |
معلومات