| پتھر |
| خواب جیسا حسین منظر ہے |
| بند کمرہ ہے، ساتھ دلبر ہے |
| تیز برسات، سخت جاڑا ہے |
| اور آغوش میں ستمگر ہے |
| مست آنکھوں سے مے چھلکتی ہے |
| نرم و نازک نفیس پیکر ہے |
| سرخ رخسار کی حرارت سے |
| راحتِ جسم و جاں میسر ہے |
| پر گھٹن تھی فضا شبستاں کی |
| مشکِ گیسو سے اب معطر ہے |
| ناز سے جو گلو پہ لرزاں ہے |
| شبنمی ہونٹ یا گُلِ تر ہے |
| جوش سے مشتعل ہے آتش داں |
| اک کشادہ نفیس بستر ہے |
| لطف سے آج گر نہیں پگھلے |
| دل تمھارا شہاب پتھر ہے |
| شہاب احمد |
| ۱۸ جولائی ۲۰۲۶ |
| خفیف مسدس مخبون محذوف مقطوع |
| فاعِلاتن مفاعِلن فِعْلن |
معلومات