| ہے کس کی کیا بساط بتاتی ہے نوکری |
| انساں کو آئینہ یوں دکھاتی ہے نوکری |
| تعبیر جسکی ملتی نہیں ہے تمام عمر |
| کچھ اس طرح کے خواب دکھاتی ہے نوکری |
| بن تجربے کے ڈگری کسی کام کی نہیں |
| احساس ہم کو یہ بھی دلاتی ہے نوکری |
| گر واسطہ یہ کوئی سفارش نہ ساتھ ہو |
| منہ سی وی دیکھتے ہی بناتی ہے نوکری |
| اپنی خوشی سے کون یوں کرتا ہے چاکری |
| پر کیا کریں کہ گھر بھی چلاتی ہے نوکری |
| ملتی ہے جس کو نوکری وہ جانتا ہے یہ |
| کن مشکلوں سے ہاتھ میں آتی ہے نوکری |
| مل جائے نوکری تو بھی قِصّہ ہے ناتمام |
| کیا کیا نہ آدمی سے کراتی ہے نوکری |
| در پیش کوئی مسئلہ دفتر میں ہو اگر |
| تو فکر بن کے گھر چلی آتی ہے نوکری |
| مانے نہیں اصول جو دفتر کے آپنے |
| تو چٹکیوں میں ہاتھ سے جاتی ہے نوکری |
| عہدہ بھلے ہی جتنا بھی اونچا ملے مگر |
| نوکر ہی اک طرح سے بناتی ہے نوکری |
| ہے نوکری اہم یوں تجارت کے واسطے |
| بزنس کے دانو پیچ سکھاتی ہے نوکری |
| سالم سمجھ لو نوکری ہے ایک سنگِ میل |
| منزل ابھی ہے دور بتاتی ہے نوکری |
معلومات