کیا شوخ طَرَح دار وہ اللہُ غنی ہے |
ہے مَرمَریں پیکر، قد سروِ چمنی ہے |
ہر عُضوِ بدن رشکِ عَقیقِ یَمَنی ہے |
جوبن اُس دوشیزہ کا ایماں شکنی ہے |
جس نے اُسے دیکھا جاں پہ پھر اُس کی بَنی ہے |
کیا گُل بَدَنی گُل بَدَنی گُل بَدَنی ہے |
ہے حسُن بھی جس پر نازاں وہ حَسیں ہو تم |
رُخسار ہیں شمس و قمر اور آنکھیں اَنْجُم |
پیشانی پہ ہے نور، ہے ہونٹوں پہ تَبَسُّم |
دُرِ عَدَنی دانت ہیں اور جِلد ہے قاقُم |
گو مُکھڑے پہ اِک نور کی چادر سی تَنی ہے |
کیا گُل بَدَنی گُل بَدَنی گُل بَدَنی ہے |
عشوہ ہے کہ جادو ہے ادا ہے کہ قیامت |
غمزہ ہے کہ طوفاں ہے سیہ تِل ہے کہ آفت |
چہرے کے خد و خال سے ظاہر ہے وہ حشمت |
شوخی ہے طبیعت میں بیاں میں ہے رعونت |
اُس شوخ کے ہر انگ میں ہی شُعلہ زَنی ہے |
کیا گُل بَدَنی گُل بَدَنی گُل بَدَنی ہے |
اُس خوب رو کی ایسی ادائیں ہیں، کہ بس بس |
اُس نازنیں میں ایسی اَنائیں ہیں، کہ بس بس |
آنکھوں میں سمائی وہ حیائیں ہیں، کہ بس بس |
دنیا کے حَسیں لیتے بَلائیں ہیں، کہ بس بس |
جس نے اُسے دیکھا وہ مقدر کا دھنی ہے |
کیا گُل بَدَنی گُل بَدَنی گُل بَدَنی ہے |
وہ غُنچہ دہن مہ جبیں شاہِ خُتن آیا |
دیکھا اُسے تو لوگوں میں دیوانہ پن آیا |
مہکی ہے فِضا اُس کو جو عرقِ بدن آیا |
مہندی لگی تو ہاتھ میں رنگِ چمن آیا |
آنکھیں اُٹھیں تو دو جہاں کی بات بَنی ہے |
کیا گُل بَدَنی گُل بَدَنی گُل بَدَنی ہے |
جوتِ رخِ معصوم ہے یا رات کی رانی |
گِرتے ہوے آنسو ہیں کہ شبنم افشانی |
دنیا کو مہکائے مسامات کا پانی |
رُخسار گُل اَحمر ہیں اور آنکھیں مستانی |
جو جِلد ہے نرم اور مُلائم سی بَنی ہے |
کیا گُل بَدَنی گُل بَدَنی گُل بَدَنی ہے |
وہ شاخچہ ہے یا کہ کمر باد سے ہلتی |
نازک بدنی کی ہے قبا برگِ سمنی |
غمزہ بَلا ہے کھال میں ریشم سی ہے نرمی |
چہرے پہ وہ بَل کھاتی لَٹ ہے سیہ سپنی |
اُس مہ جبیں کا کام سَدا دل شکنی ہے |
کیا گُل بَدَنی گُل بَدَنی گُل بَدَنی ہے |
زُلفوں سے خَجِل کھاتی گھٹائیں ہیں، وہ دیکھو |
انفاس میں جنت کی ہوائیں ہیں، وہ دیکھو |
حُوریں بھی کریں اُس کی ثنائیں ہیں، وہ دیکھو |
قرباں اہلِ حُسن ہو جائیں ہیں، وہ دیکھو |
دیکھو، یہ مہ رُو دیکھنے لائق ہی بَنی ہے |
کیا گُل بَدَنی گُل بَدَنی گُل بَدَنی ہے |
گُل دیکھ کے ہونٹوں کی نزاکت، ہوا نادم |
تو سروِ چمن دیکھ کے قامت، ہوا نادم |
اور دیکھ کے گیسو رخِ ظلمت، ہوا نادم |
جس نے بھی کی ہے اِس سے محبت، ہوا نادم |
یہ خوبرو تو ہے پر پیماں شکنی ہے |
کیا گُل بَدَنی گُل بَدَنی گُل بَدَنی ہے |
لہجے کی مثل ہے نہ ترنم کا ہے ثانی |
پھٹتے ہیں گریباں سُن کر سِحْر بَیانی |
ہر لفظ میں حشمت کا ہے رنگِ معانی |
ہے نطق میں بھپری ہوئی لہروں کی روانی |
لفظوں سے رواں قلزمِ شیریں سخنی ہے |
کیا گُل بَدَنی گُل بَدَنی گُل بَدَنی ہے |
یہ خاک کا پُتلا ہے کہ اِک نورِ مُجَسَّم |
عارض پہ ہے آنسو کہ ہے اِک قطرہِ شبنم |
چہرے پہ ہیں آنکھیں کہ ہیں مُندری میں دو نیلم |
یہ بنتِ قمر تو ہے حسیناؤں کی خانم |
ہاں یہ مورت گُل رخی و سیم تَنی ہے |
کیا گُل بَدَنی گُل بَدَنی گُل بَدَنی ہے |
کُل بزم کے ہیں ہوش اُڑے وہ سیم تن آیا |
فتنے اُٹھے، ماتھے پہ گر اِک بھی شکن آیا |
ساکت فُصَحا ہیں وہ جو شیریں دہن آیا |
وہ بولا تو نادانوں کو طرزِ سخن آیا |
یہ جنبشِ لب ردِ رنج و مِحَنی ہے |
کیا گُل بَدَنی گُل بَدَنی گُل بَدَنی ہے |
آمد پہ ہے واعظ بھی اب انگشت بدنداں |
واعظ کیا ہے اہلِ فصاحت بھی ہیں حیراں |
دیکھا اُسے تو سب کو ہوئی فکرِ ایماں |
انگڑائی سے جس کی ہیں تمام آسماں رقصاں |
اُس بُت کی جوانی بھی کیا پُر فِتَنی ہے |
کیا گُل بَدَنی گُل بَدَنی گُل بَدَنی ہے |
باتوں سے لگے تیر، نظر سے لگے پیکاں |
جوبن میں نِہاں ہے کِشت و خوں کا وہ ساماں |
مَت دیکھیں تو جاں جائے گی، جو دیکھیں تو ایماں |
کوئی کرے تو کیا کرے، ہے خلق پریشاں |
دیکھو اب ہر طَور ہی مشکل سی بَنی ہے |
کیا گُل بَدَنی گُل بَدَنی گُل بَدَنی ہے |
دل سے مرے اب نکلیں اُسے دیکھ کے آہیں |
وہ سامنے گر ہو تو نہیں ہٹتیں نگاہیں |
یہ عشوہ یہ ناز و ادا یہ پھول سی بانہیں |
کیسے نہ اے شاہدؔ بتِ خوش شکل کو چاہیں |
فطرت میں ملی عاشقی و برہَمَنی ہے |
کیا گُل بَدَنی گُل بَدَنی گُل بَدَنی ہے |
معلومات