| خدا دی ونڈ |
| رب دی دھرتی دے رنگ وکھرے |
| میں روز ڈہداں چودھار سنڑداں |
| کہیں دے محل ان جو زرق برق ان |
| کہیں دے سوہنڑے شہزادے نینگر |
| مٹی تے گارے دے وچ غرق ان |
| کہیں دے کتے وی کھیر کھاندن |
| کہیں دے بکھے نمانڑے بالاں دی اکھیں وچوں نیر وہدن |
| کہیں دی دولت سنبھالن کیتے ہزار نوکر ہزار چاکر |
| کہیں دے گھر وچ فاقے رل تے |
| دھمال پیندن بکھ نچیندن |
| کہیں دی تریمت کو پاونڑ کیتے |
| ہزار گھبرو قطار لگدن |
| کہیں دی سوہنڑی شہزادی نینگر |
| کوں چنی ساوی نصیب کائینی |
| آخر ہک ڈیں سوچاں توں اک تھی کے |
| دور وستی دی ٹاہلی چھانوٰیں |
| چند غریباں دا کٹھ ڈہداں |
| تے وت سوچینداں |
| کیوں نہ انھاں دے کول بہہ تے |
| انہاں دی غربت دا راز جانڑاں |
| پج تے ڈردیں سوال کیتیم |
| ڈساوو میکوں غریب لوکو |
| اے بھوگ غربت دا کیوں بھگیندو |
| بکھ دے ہوٹے جگر دے ٹکڑے |
| در در رلیندو جا جا وچیندو |
| جواب آیا او شاعر پاگل |
| نظر نئیں آندی خدا دی ونڈ اے |
| کہیں کوں ڈیوے تاں رج تے ڈیندے |
| کہیں توں گھندے تاں منٹ لیندے |
| کہیں دی مٹی کوں سونا کیتس |
| کہیں کوں ہیرے تے لعل ڈیندے |
| کہیں دے بختاں کوں بھاگ لا تے مال ڈیندے تے بال ڈیندے |
| اساں غریباں دی سیت وچ ہن |
| فاقے غربت تے نیر کاکا |
| اساڈے ہتھاں نصیب والی لکیر کائنی |
| تہوں اساں وت امیر کائنی |
| تکرار ساڈی طویل تھی گئی |
| اے لڑھ مریندیں جو شام تھی گئی |
| ونج تے آخر اوں گال کیتی |
| سائیں رب نہ ڈیوے تاں کیا کروں ول |
| حیران تھی کے خدا ڈو ڈٹھم |
| اینویں دل ای دل اچ سوال کیتم |
| میڈا مالک توں سب توں اکبر |
| توں سب دا خالق تے سب دا مالک |
| نہ میں موسیٰ اقبال کائنی |
| جو تیڈا شکوہ کراں میں بہہ تے |
| یا تیں توں سوال پچھاں کوئی گالھ پچھاں |
| پر ایہھا عرضی ہے رب سوہنڑاں |
| اے کیا تماشا میں ڈہداں بیٹھاں |
| انہاں دی غربت دا راز کیا ہے |
| سوز کیا ہے تے ساز کیا ہے |
| جڈاں فلک توں دھرتی ڈو سر نوایم |
| ہنج وہایم |
| وت رب نے دل وچ اے گال پاتی |
| جو |
| رب تاں ڈیونڑ کوں تیار بیٹھے |
| انہاں کوں منگنڑ دا ڈا نئیں آندا |
معلومات