| بت کو خدا بناؤ یہی میری رائے ہے |
| حد سے گزر ہی جاؤ یہی میری رائے ہے |
| کعبے میں گر نماز نہ پڑھنی ہے مت پڑھو |
| اس کو تو سر جھکاؤ یہی میری رائے ہے |
| ہر درد کو دوا کہو ہر وار کو کرم |
| ہر غم پہ مسکراؤ یہی میری رائے ہے |
| پھولوں کو چننے والے بہت ہیں چمن میں اب |
| تم خار ہی اٹھاؤ یہی میری رائے ہے |
| ہم تو تمہارے پیر دباتے ہی رہ گئے |
| اور مال تم دباؤ یہی میری رائے ہے |
| ہر اک ستم پہ داد انھیں دو مگر زبیر |
| زخموں کو بھول جاؤ یہی میری رائے ہے |
| سینہ پہ پھر سے مارو ذرا خنجرِ نگاہ |
| مقتل میں خوں بہاؤ یہی میری رائے ہے |
معلومات