| ہمارا اوڑھنا ہو یا بچھونا، شاعری ہے |
| یہ اٹھنا بیٹھنا اپنا یہ سونا شاعری ہے |
| ہماری زندگی جتنی بھی اب باقی بچی ہے |
| ہمارا مسکرانا اور رونا شاعری ہے |
| ضرورت ہی نہیں، شکوہ شکایت کیوں کریں ہم |
| دلِ مغموم کو اشکوں سے دھونا شاعری ہے |
| جدائی کا گلہ دنیا سے کر کے کیا ملے گا |
| غمِ ہجراں کو لفظوں میں پرونا شاعری ہے |
| بہت غم ہیں زمانے میں نظر جس سمت ڈالو |
| انھیں گیتوں کی بحروں میں سمونا شاعری ہے |
| نہیں ہے بے قراری ہجر میں بھی اب تو دیکھو |
| بہل جاتا ہے دل، اس کا کھلونا شاعری ہے |
| تمنا آرزو چاہت سدا آباد رکھنا |
| قلم کی پیٹھ پر خوابوں کو ڈھونا شاعری ہے |
معلومات