| دل میں جب سے آ بسا ہے تیری چاہت کا شعور |
| ہر گھڑی رہتا ہے طاری، اب مری جاں پر سرور |
| کیمیا گر عشقِ حق ہے، دل کی دنیا کے لیے |
| سنگِ دل کو یہ تراشے، لعل کر دے گا ضرور |
| شوق دیدارِ الٰہی نے کیا تھا بے قرار |
| عشق ہی لے کر چلا موسیٰ کو سوئے کوہِ طور |
| عشق ہی منصور کو لے کر گیا تھا دار پر |
| حق انا الحق لب پہ آیا، عشق کا تھا سب قصور |
| چشمِ باطن جب کھلی تو، ہر جگہ پایا اسے |
| قلبِ مومن میں ہوا ہے، حق تعالیٰ کا ظہور |
| سیکھ لے انسان گر سچی وفا کی بندگی |
| عاجزی دل میں بسے تو، مٹ سکے سارا غرور |
| مٹ ہی جائے گی شبِ غم کی یہ ساری تیرگی |
| راہِ منزل کی ملے تو، مٹ سکے سارا فتور |
| ذکرِ محبوبِ حقیقی سے منور ہو جو قلب |
| عشق کی شدت بڑھے تو، رخ پہ پھر آ جائے نور |
| مٹ گئی ہے ذات اس کی، یار کی چاہت میں آج |
| شادؔ کو راہِ وفا میں، مل گیا حق کا حضور |
معلومات