| ان کی چشم ناز یوں ہم سے سخن سازی کرے |
| جیسے فطرت زندگی کے غم کی غمازی کرے |
| سو جتن سے دل مرا سینے سے نکلا چاہے ہے |
| کام کچھ ایسا ہی اف تیری خوش آوازی کرے |
| لڑ سکیں گے اس طرح تیری محبت کا جہاد |
| مولوی دل کو بنا دے آنکھ کو غازی کرے |
| منشاء دین و شریعت ہے تصوف کا طریق |
| کوئی تن سازی سے پہلے کیوں نہ دل سازی کرے |
| حال کی بد حالیوں کا حال تو جو ہے سو ہے |
| پھر خلش ماضی کی بھی کچھ رخنہ اندازی کرے |
| عقل پر ہوتا نہیں ہے آیت جاں کا نزول |
| سو یہ چوپائے کی مانند خوب تن سازی کرے |
| قتل کی تعبیر اس سے ہی محبت میں ہوئی |
| آنکھ کے جن زاویوں سے شعبدہ بازی کرے |
| کائنات حسن میں بکھرا کیے نقش و نگار |
| تیری صورت کی مصور چہرہ پردازی کرے |
معلومات