| میری جو عاجزی ہے، دربارِ یار لے جا |
| یہ اشک حِجر کے ہیں، بادِ بہار لے جا |
| نالاں کھڑا ہوں اس جا، شہرِ نبی کے زائر |
| کچھ نالے میرے دل کے، اُن کے دیار لے جا |
| گر تیرے راستہ میں، ہوں طُور سے وہ جلوے |
| تو اپنے ساتھ میرے، ہوش و قرار لے جا |
| بابِ حبیب پر میں، آؤں سلام کرنے |
| گجرے درود کے ہیں، اُن کے دیار لے جا |
| نثارِ نعلِ جاں ہوں، قُربان جان میری |
| اُس شاہ کے چمن میں، یہ داماں تار لے جا |
| اے عازمِ حرم یہ، اس دل سے ہے ندا اب |
| عاصی سے ساتھ اپنے سارے شعار لے جا |
| اُن کا دیا ہے پیارے، اپنا کہاں سے میرا |
| یہ آن شان غیرت، اُن پر نثار لے جا |
| کب نام کی ہے چاہت، کیا آرزو ہے شاہی |
| میری طلب ہیں دلبر، یہ دل ہے زار لے جا |
| مثلِ غبار ہے اب، میری لحد سے مٹی |
| یہ گرد بادِ فاراں، تو باغِ یار لے جا |
| بیمار عشقِ جاناں، کہتا ہے یہ زمانہ |
| ہے زندگی جہاں پر، ہوں اشک بار لے جا |
| محمود حسن اُن کا، بے مثل ہے خَلق میں |
| یہ جان و دل مدینے، اے راز دار لے جا |
معلومات