| وسعتِ کون و مکاں میں دشتِ امکاں خیمہ زن |
| چشمِ حیراں کے مقابل رازِ پنہاں خیمہ زن |
| ٹوٹ کر بکھری ہیں کلیاں آرزو کی شاخ سے |
| خلوتِ احساس میں اب دردِ ہجراں خیمہ زن |
| تند لہروں کی طنابیں کھینچتا ہے آسماں |
| بحرِ ہستی کے سفر میں شورِ طوفاں خیمہ زن |
| چشمِ بینا کے لیے ہے ظلمت تاریک تر |
| مسندِ انصاف پر اب جبرِ دوراں خیمہ زن |
| نیند آنکھوں سے اڑی ہے کربِ ہستی کے سبب |
| دیدۂ حیراں کے اندر خوابِ ویراں خیمہ زن |
| حسرتوں کی راکھ میں اب ڈھونڈتا ہے کیا جنوں |
| سرد محفل میں پرانا خونِ ارماں خیمہ زن |
| اے مرے المیرؔ! تیری طبعِ صوفی کے طفیل |
| قلبِ روشن میں ہمیشہ نورِ عرفاں خیمہ زن |
معلومات