| نئی لو شمعِ دل میں آ رہی ہے |
| پیامِ صبحِ نَو پھر لا رہی ہے |
| تجھے مجھ سے تعلق ہی نہیں ہے |
| مگر تو عشق بھی فرما رہی ہے |
| امانت دار ہے بادِ بہاری |
| مرا ہر زخمِ دل لوٹا رہی ہے |
| سمجھ داروں پہ آتی ہے مصیبت |
| یہ ناسمجھی مجھے سمجھا رہی ہے |
| کسی کو یاد کرنا مسئلہ ہے |
| مجھے اب یادوں کی یاد آ رہی ہے |
| تری تکلیف ہے میری اذیت |
| تڑپ کر تو مجھے تڑپا رہی ہے |
| لبوں پر مسکراہٹ ہے عجب سی |
| کلی دل کی مگر مرجھا رہی ہے |
| مری دھڑکن سخن نے تیز کر دی |
| غزل سازِ وفا پر گا رہی ہے |
| نشے میں بھی تجھے پہچانتا ہوں |
| مئے وحدت سبو چھلکا رہی ہے |
| قدامت آشنا مذہب پہ پیہم |
| نئی تہذیب تو مسکا رہی ہے |
| وہی تہذیب جو عرصے سے اب تک |
| ہر اک انساں کو زندہ کھا رہی ہے |
معلومات