| تحلیل ہو گیا میں کہِیں حِدّتوں کے بِیچ |
| شبنم کی کیا بساط بھلا سُورجوں کی بیچ |
| کِس کو خبر کہ آنکھ ہو تیری بلیک ہول؟ |
| دنیائیں ڈُوبتی ہوں انھی آئنوں کے بیچ؟ |
| حیران کر رہا ہے یہ دَھک دَھک کا سلسلہ |
| جاری ہے کس کا وِرد مری دھڑکنوں کے بیچ؟ |
| دیکھا ہے اُس کو بارہا دُنیا کی بھِیڑ میں |
| وہ مُنفرِد دِکھائی دِیا سینکڑوں کے بیچ |
| کیا بدشگُون باس ہے دفتر میں چار سُو؟ |
| کِس جھُوٹ کی سڑاند ہے اِن فائلوں کے بیچ؟ |
| احساس بِک رہے ہیں یہاں کوڑیوں کے دام |
| جذبات رائگاں نہ کرو بیدلوں کے بیچ |
| اِس عالمی دیہات کا یہ المیہ ہے دوست |
| نفرت دراڑ بن گئی ہے رابطوں کے بیچ |
| چھپرے تجاوزات کے زمرے میں آگئے |
| کاخ و قُصُور پھیل گئے ایکڑوں کے بیچ |
| اے دِل بہت اداس ہے ماحول شہر کا |
| گاؤں میں چل کے بیٹھتے ہیں پیپلوں کے بیچ |
| کِس نے کہا کہ ہو گئی ہے کربلا تمام |
| اب تک حُسین لڑ رہا ہے کُوفِیوں کے بیچ۔۔! |
| تُم برگِ نامراد تھے نِچلے تنوں پہ خُوش |
| سُوکھے کے سُوکھے رہ گئے نا بارشوں کے بیچ۔۔! |
| پہلے ہی کہہ دِیا تھا کہ منزل ہے ناپدِید |
| تُم لوگ کر رہے تھے سفر دائروں کے بیچ |
| جام و سبُو میں گھول کے پی جاؤ اِضطراب |
| ذہنی دباؤ ہے تو چلو میکشوں کے بیچ |
| بچپن سے اِک بزُرگ کی اِک بات یاد ہے |
| آسانیاں چھپی ہوئی ہیں مُشکلوں کے بیچ |
| فتح و شکست کا نہیں تعداد پر مدار |
| کافی ہے اِک دلیر بھی سو بُزدلوں کے بیچ |
| امبر یہ داغ زخمِ ہزِیمت سے ہے بڑا |
| غدّار گُھس گئے ہیں مرے لشکروں کے بیچ |
معلومات