| رنج و غم سے ہے عبارت یہ کِتابِ زندگی |
| رو دیے ہم دیکھ کر اک دن نصابِ زندگی |
| پوچھتے ہو کیا ہماری داستانِ زیست تم |
| جی رہے ہیں پر نہیں ہے اب تو تابِ زندگی |
| مطمئن ترکِ وفا کے بعد ہے وہ بھی بہت |
| ہم بھی سہہ جائیں گے آخر یہ عذابِ زندگی |
| ہو گئی ہیں مختصر اب انجمن آرائیاں |
| ایک ہم ہیں اور اک یہ اضطرابِ زندگی |
| آن لیٹے ہیں ابھی اہلِ جہاں کے ہم ستائے |
| اے فرِشتو آ گئے لینے حسابِ زندگی |
| جام کوئی ساقیا میرے اِدھر بھی لا کبھی |
| قطرہ قطرہ پی رہا کوئی شرابِ زندگی |
| وَرغَلا کے اِس دِلِ ناداں کو دیکھو تو سہی |
| موت کے نزدیک لے آیا ہے خوابِ زندگی |
| زندگی جس کو سمجھ کر جیتے تھے زاہد کبھی |
| زندگی کب تھی مگر تھا اِک سرابِ زندگی |
معلومات