| بازار حسن عشق کے ماحول میں رہے |
| یعنی تمام عمر اسی جھول میں رہے |
| خانہ بدوشی میں ہی کٹی ہے تمام عمر |
| ہم شہر میں بھی دشت کے ماحول میں رہے |
| ہم پر عیاں نہ اپنی حقیقت ہی ہو سکی |
| اور تم بھی غفلتوں کے کسی خول میں رہے |
| جینے کی میں بھی خوب اداکاریاں کروں |
| بالجبر خود کشی ہی مرے رول میں رہے |
| بے غیرتی کی بھیک سے اللّٰہ کی پناہ |
| خود داری کا جو سکہ ہو کشکول میں رہے |
| مجھ سا سیاہ کار بھی جنت میں جائے گا |
| پیاسے کی کوئی بوند مرے ڈول میں رہے |
| بے اعتناء سمجھتا رہا ہے ہمیں جہاں |
| پھر خاص چیز کی طرح انمول میں رہے |
| جب حوصلہ شکن رہیں حالات زندگی |
| حرفِ تسلّی کیوں نہ ترے بول میں رہے |
| ہم کو نہ کیجے مصر کے بازار میں فروخت |
| یوسف کی طرح ہم بھی کہاں مول میں رہے |
معلومات