| یہ ہجرتوں کا تسلسل یہ شہرِ یار کی یاد |
| یہ ہم نفس کی جدائی یہ غم گسار کی یاد |
| طلوع صبح کی رنگین یاد باقی ہے |
| بڑی حسین ہے خوشبوئے لالہ زار کی یاد |
| گلی گلی میں درخشاں گئے دنوں کے نشاں |
| چمن چمن میں مہکتی جمال یار کی یاد |
| اسی کی یاد سے روشن دیے امیدوں کے |
| خزاں کے غم کا مداوا گئی بہار کی یاد |
| میں چل پڑوں تو مرے ساتھ ساتھ چلتی ہے |
| ٹھہر سکوں تو ٹھہر جائے انتظار کی یاد |
| ترے فراق میں آتی ہے بام و در سے یہاں |
| ترے کلام کی خوشبو ترے شعار کی یاد |
| یہی کمال مری جستجو کا حاصل ہے |
| کبھی کبار کا ملنا ہزار بار کی یاد |
معلومات