| جس دل میں عزم و جنوں نہ ہو وہ دل بھی اے دل کیا دل ہے |
| جو دریا تلاطم خیز نہ ہو بہتر تو اس سے ساحل ہے |
| محفل میں جیالوں کے چرچے ہر آن تو ہوتے ہیں لیکن |
| دیکھو کہ جیالوں سے یکسر محروم تری یہ محفل ہے |
| وہ دشتِ جنوں پرور مجنوں کیوں پھرتا رہے شوریدہ سر |
| وہ قیس کہاں سے پیدا ہو لیلی سے تہی جب محمل ہے |
| گر زورِ سیاست سے مومن محروم رہا تو ممکن ہے |
| ایمان پہ مر تو سکتا ہے ایمان پہ جینا مشکل ہے |
| تہذیب سے قومیں زندہ ہیں تہذیب مگر کیوں زندہ ہو |
| تہذیبِ مسلماں کی خاطر غیروں کی سیاست قاتل ہے |
| جو قوم کہ مستقبل بینی میں کل تک سب سے آگے تھی |
| اس قوم کی حالت تو دیکھو اب حال سے بھی وہ غافل ہے |
| اس قوم کے سایے میں پل کر تجھ کو تو محافظ بننا تھا |
| اسلام کو تجھ سے اے شاہؔی ! اب تو ہی بتا کیا حاصل ہے |
معلومات