.jpg)
| ۱ |
| سارے حرف الہامی رب دی قدرت ہے |
| ہر حرف نے پائی شکل وکھری فطرت ہے |
| ایہہ حرف نے راز الہی کوئی سمجھے تے |
| الف نشانِ وحدت باقی کثرت ہے |
| ۲ |
| الف اللہ نوں اَوّل آخر اَبَد دسے |
| الف اِلٰہ نوں اِک اکیلا اَحَد دسے |
| الف انسان اَمَر تے راز الف دا اے |
| الف انسان نوں وچ قرآن اَلَد دسے |
| ۳ |
| الف نے پایا تاج لولاکی میم ہویا |
| میم دے اوہلے ظاہر نورِ قدیم ہویا |
| الف تے میم نوں وکھ نا جانیں اے بندیا |
| ویکھ الف ہے کعبہ میم حطیم ہویا |
| ۴ |
| پہلے میم نے کیتی حمد بَنُورِ محمد جی |
| فیر الف نے کیتی حمد حَضُورِ احمد جی |
| پا کے لبادہ خاکی ایہہ میم نے دسیا اے |
| حمد کرے انسان جو اِس دا مقصد جی |
| ۵ |
| میم مظہر الف اصل دا اے |
| میم رستہ رب دے وصل دا اے |
| جد منگیے الف توں میم دا صدقہ |
| مینہ وسدا رب دے فضل دا اے |
| ۶ |
| ملے میم تے ملدا الف ہے جی |
| ہوندا پانی دسدا برف ہے جی |
| باجھ میم نہ ملدا الف ہے جی |
| الف موتی میم صدف ہے جی |
| ۷ |
| پہلا کلمہ الف تے میم دا اے |
| چودہ صدیاں تو وی قدیم دا اے |
| توبہ آدم دی وی قبول کرائی |
| ایسا کلمہ رسول کریم دا اے |
| ۸ |
| کیتی کلمے نے ظاہر الف دی برکت ہے |
| ویکھو لَا ہے لفظِ نفی تے اِلَّا مثبت ہے |
| الف نے کیتی دور لَا دی ظلمت ہے |
| الف جے ہووے نال تے منفی مثبت ہے |
| ۹ |
| پہلا لفظ کلمے دا "لَا" بندیا |
| "لَا" نفس اپنے تے چَلا بندیا |
| تیری "میں" جھوٹا اِلٰہ ہوئی |
| اس "میں" نوں پہلے مُکا بندیا |
| ۱۰ |
| پاک شرک توں کر وجود میاں |
| سمجھ رب نوں موجود مشہود میاں |
| رَکھ اُس نوں مقصود معبود میاں |
| بھیج نبی تے ہر دم درود میاں |
| ۱۱ |
| رکھ الف میم تے ایمان مکمل |
| کر تو مالک دی پہچان مکمل |
| ہوئی ختم نبوت محمد تے |
| رکھ اس گل دا دھیان مکمل |
| ۱۲ |
| جد لا الہ دی کرے تو تکرار جانی |
| الا اللہ وی کردا اے اظہار جانی |
| لا الہ توں سوہنیا ہن اگے چل |
| اصل اصول تے کر تو اصرار جانی |
| ۱۳ |
| جدوں الف نے کھچی قوس تے لام بنی |
| اس قوس وچ خلقت خاص و عام بنی |
| لام لاہوتی بھیس وٹایا ناسوتی |
| تاں فلک زمین اندر چھے ایام بنی |
| ۱۴ |
| الف اللہ بخش، اللہ یار دی اے |
| میم ماہی تے سائیں مراد دی اے |
| ہے الف تے میم غلام دے وچ |
| جہنوں آس خواجہ یار دی اے |
معلومات