| دَرِ ہستی کھلے جب بھی، مِری حیرت پہ کھلتا ہے |
| سفر کا آخری رستہ، مِری وحشت پہ کھلتا ہے |
| گلے مل کر بھی دل اپنا جدا ہی رہ گیا تجھ سے |
| جدائی کا نیا رستہ، عجب قربت پہ کھلتا ہے |
| نہ سمجھے تھے جسے ہم عمر بھر قربت کے موسم میں |
| وہ نکتہ آخرش اک لمحۂ رخصت پہ کھلتا ہے |
| ہجومِ خلق سے اک فاصلہ رکھ کر سمجھ آیا |
| درونِ دل کا ہر رستہ، مِری خلوت پہ کھلتا ہے |
| غمِ دوراں کے چکر میں کٹی ہے زندگی ساری |
| نفس کی ڈور کا نغمہ، ذرا فرصت پہ کھلتا ہے |
| دیارِ غیر کی سڑکوں پہ جب تنہا نکلتا ہوں |
| ہوا کا ہر خنک جھونکا، مِری غربت پہ کھلتا ہے |
| بظاہر روشنی کا شور برپا ہے زمانے میں |
| ہمارا روزنِ زنداں، فقط ظلمت پہ کھلتا ہے |
| پرانے مقبروں پر جب گزرتی ہے ہوا شب کی |
| تو شاہوں کا ہر اک مدفن، درِ عبرت پہ کھلتا ہے |
| ستاروں سے پرے جا کر جو دیکھا اس سمندر کو |
| سماواتِ ازل کا در، فقط وسعت پہ کھلتا ہے |
| ترے شعروں میں المیرؔ اب نوائے درد ایسی ہے |
| کہ تیری فکر کا ہر در نئی رفعت پہ کھلتا ہے |
معلومات