| جانتا ہوں مرے کوچے کی روایت کیا ہے |
| ابنِ منصور کی، سرمد کی حکایت کیا ہے |
| خواب بنتا ہوں میں ایسے جو مکمل ہی نہ ہوں |
| کون بتلائے تمنا کی نہایت کیا ہے؟ |
| سوچنا کار مشقت ہے تھکا دیتا ہے |
| خوش خیالی کی رعایت بھی رعایت کیا ہے |
| دشمنوں سے جو ہوا ان سے وہی ہونا تھا |
| دوستوں نے بھی دکھایا کہ 'حمایت' کیا ہے |
| کاوشیں، گریہ، دعائیں سبھی انجام ہوئیں |
| منتظر ہوں کہ بڑے در سے عنایت کیا ہے |
| راہِ پر خار پہ دامن کو بچا کر رکھنا |
| اس توجہ کے سوا اور ولایت کیا ہے |
| عشق کی راہ میں خطرے ہیں خرابی کے بہت |
| جو کہا تھا وہ ہوا ہے تو شکایت کیا ہے؟ |
معلومات