| جسم کا انہدام خاموشی |
| روح کا انتقام خاموشی |
| حکم جاری ہوا قیامت کا |
| رات دن صبح شام خاموشی |
| بند کمروں میں چیخئے خود پر |
| پیشِ عالی مقام خاموشی |
| حرف بے صوت ہو گئے سارے |
| ہو کا عالم تمام خاموشی |
| جھوٹ کا شور سب کے کانوں پر |
| صدق کا التزام خاموشی |
| کتنی بنجر زمین ہے جس سے |
| اگ رہی ہے مدام خاموشی |
| ہم فقیروں کی آہ و زاری پر |
| چیختے ہیں غلام، خاموشی! |
| لب کشائی نہ کر سکے وہ بھی |
| جن پہ ٹھہری حرام خاموشی |
| عمر بھر شاعری سے کیا حاصل |
| بس یہی کل کلام، خاموشی |
معلومات