نہ ہی لی خبر مرے حال کی نہ ہی کچھ سنی مری بات بھی

نہ ہی لی خبر مرے حال کی ، نہ ہی کچھ سنی مری بات بھی

وہ یوں چل دیا کہ مرے بنا وہ گزار لے گا حیات بھی

دلِ بے قرار یہ بات سن کوئی ڈھونڈ اور ہی چارہ گر

یہ ترے مرض سے ہیں بے خبر ،نہیں ان کے بس کی یہ بات بھی

اسی قحطِ عشق کے حال میں یہ نگر ہی دل کا اجڑ گیا

اسی واسطے تو یہ عشق کی ہمیں جائز اب ہے زکات بھی

وہ جدا ہوا ہے ابھی ابھی ، کہ ہے زعمِ حسن میں مبتلا

تو بلا بھی لے تو نہ آئے گا ، ابھی وہ نہ سمجھے گا بات بھی

دلِ بے خبر کی نہ بات کر ، یہ بھلے برے سے ہے بے نیاز

کبھی تو اڑا ہے فراق پر ، کبھی چاہتا ہے یہ ساتھ بھی

کوئی معجزہ ہو کہ حادثہ مرے ذہن و دل سے مگر مٹیں

خط و خال زہرہ جمال بھی ، رہے یاد اس کی نہ بات بھی

نہیں ایسی کوئی بھی شے یہاں کہ کبھی نہ جس کا ہو اختتام

دلِ جلد باز ذرا ٹھہر ، کبھی ختم ہو گی یہ رات بھی

اسے تلخیاں شبِ ہجر کی ، جو ستائیں گی تو تُو دیکھنا

وہ پھر آئیگا تجھے دیکھنے تو کرے گا وصل کی بات بھی

بہت خوب