مقصود حکمِ کن فکاں آنے حضور کے |
زیبائے انجمن ہیں ترانے حضور کے |
اول ہے نورِ مصطفیٰ محشر ملا انہیں |
دائم رواں جہاں میں زمانے حضور کے |
ذکرِ حبیب جان ہے سارے جہان کی |
دونوں جہاں ہیں خیر سے خانے حضور کے |
ہر فاصلہ عبور ہے اک جستِ شوق سے |
سدرہ سے دور دیکھیں نشانے حضور کے |
اوجِ فلک پہ خاص ہے جانا حبیب کا |
ہر شان میں ہیں اعلیٰ ٹھکانے حضور کے |
تاباں فضائے کون ہے ان کے جمالِ سے |
ہر اک جہاں سے ما وریٰ جانے حضور کے |
خود جانتا خدا ہے حقیقت محمدی |
رتبے کہاں خلق نے ہیں جانے حضور کے |
لطف و کرم ہے ہر جگہ فیضِ حبیب سے |
مولا نے بھر دیے ہیں خزانے حضور کے |
محمود معتبر ہیں سب اجدادِ مصطفیٰ |
کتنے یہ فیض رس ہیں گھرانے حضور کے |
معلومات