| آؤ رَل کے دُکھ ونڈا ئیے ، ماں تے سانجھی ہندی اے |
| تیرا دکھ، ساڈا وی دکھ اے ، ماں تے سانجھی ہندی اے |
| جِدے تے پیراں وچ جنّت سی ، جنّت نوں او ٹُر پئی |
| اسیں تے سارے پچھّے ریہہ گئے ، ماں تے سانجھی ہندی اے |
| سارے جگ نوں آپ ہنساویں، دُکھ درداں نُوں ونڈیں |
| لوکیں کئیندے بلّے بلّے ، ماں تے سانجھی ہندی اے |
| وَسّوں باہر نہ جے کر ہُندا ، جاندی نہ ماں چھَڈ کے |
| راضی ربّ دی مرضی اُتّے ، ماں تے سانجھی ہندی اے |
| گھڑی مُڑی اوہ چیتے آوے، اوہنوں کوَن بُھلاوے |
| ہَو کے بھر کے ، درد ، رُلاوے ، ماں تے سانجھی ہندی اے |
| سوچاں دے وچ پے کے ، بیبا ، گھر دے پھیرے لاواں |
| فِر وی کیوں ایہہ جی گھبرا وے ، ماں تے سانجھی ہندی اے |
| یارا تینوں ہور کی دسّاں ، دل دے دُکھڑے پھولاں |
| یاراں نال جے یاری ھوندی ، ماں تے سانجھی ہندی اے |
معلومات