| اپنے دیوانے کو عکسِ رخِ فرہاد رکھے |
| اجنبی شہر میں اب کون ہمیں یاد رکھے |
| شوقِ نظارۂ گلزار یہاں کچھ بھی نہیں |
| گرمئ عارضِ گلنار یہاں کچھ بھی نہیں |
| لطفِ زلف و لب و رخسار یہاں کچھ بھی نہیں |
| کششِ حسنِ رخِ یار یہاں کچھ بھی نہیں |
| کچھ نہیں جس سے کہ تسکینِ دل و جان کریں |
| اپنی آوارہ مزاجی کا ہی سامان کریں |
| نغمہ و شعر سے پیدا کوئی دیوان کریں |
| زندگی موجِ حوادث میں بھی آسان کریں |
| نقش ہے لوحِ جہاں پر جو وہ تحریر ہو تم |
| کتنی آنکھوں کے حسیں خوابوں کی تعبیر ہو تم |
| سلسلے شوق کے ، جذبات کی تصویر ہو تم |
| کسی فن کارِ جہاں ساز کی تعمیر ہو تم |
| ہم نہیں اہل سیاست جو تمہیں غیر رکھیں |
| ہم کہ دیوانے ہیں دیوانوں سے کیا بیر رکھیں |
| ہم کہ پابندِ حرم رسم و رہِ دیر رکھیں |
| ہم کہ محصورِ ستم سلسلۂ خیر رکھیں |
| دشتِ تنہائی کو کس رنگ میں آباد رکھے |
| اجنبی شہر میں اب کون ہمیں یاد رکھے |
معلومات