پورا دیوان ایک ہی دن میں سنانے کی کوئی وجہ ؟

عزیزم بعض اوقات وقت بعد کی مہلت نہیں دیتا اور یہ مجھ سے بہتر بھلا کون ہی بتا پائے گا۔ کوشش کر رہا ہوں جتنا لکھا ہے محفوظ کر لوں۔تاہم آپ کی دل آزاری کے لیے معذرت۔

محسن رضا صاحب - دل آزاری والی کوئی بات نہیں بس ایک ہی شاعر کا اتنا سارا کلام ایک ساتھ پڑھنا اور وہ بھی نئے شاعر کا تھوڑا محنت طلب امر ہے - لیکن کوئی بات نہیں -

اتنا ضرور کہوں گا کہ آپ میں پوٹینشل نظر آیا اگر آپ اپنی اردو پہ توجہ دیں تو - آپ بہتر کہہ سکتے ہیں زرا زبان بہتر کیجیئے - اچھی اردو شاعری کی اساس ہے - ورنہ شاعر ترقی نہیں کر سکتا -

میں اپنی بات کو واضح کرنے کے لیئے آپ کی اسی غزل پر کچھ گزارشات پیش کرتا ہوں - آپ متفق ہوں تو ان کو سنجیدگی سے لیجئے گا ورنہ باقی سب کی طرح چار حرف بھیج کے آگے بڑھ جائیے گا -

نہ رویا کرو میری یادوں کو لے کر
---- اردو میں اس طرح "لے کر" کچھ نہیں ہوتا - یہ انڈیا کے میڈیا کا سلینگ ہے - اس کو اردو میں وجہ سے یا کے لیئے - یا برائے وغیرہ الغرض کہ بہت سارے انداز سے کہا جاتا ہے مگر "لے کر" ہر گز نہیں کہتے -
اسی طرح آپ نے لکھا ہے "مجھ سے بہتر بھلا کون ہی بتا پائے گا" اس میں اردو زبان میں "ہی" کا کوئی محل نہیں ہے - اے کہتے ہیں "مجھ سے بہتر بھلا کون بتا پائے گا" - ہی کے استعمال کا قاعدہ الگ ہے -

چلے جانے والا قسم دے گیا ہے
-- اردو میں اصطلاح ہے جانے والا - چلے جانے والا کچھ نہیں ہوتا -

کیا ہے جو اس سے ہے سودا وفا کا
-- ہے کا دو مرتبہ استعمال ٖفصاحت کے خلاف ہے

وہ سودا وفا کا بھی کم دے گیا ہے
بنایا تھا جس نے مرا آشیانہ
دلاسے میں مجھ کو وہ غم دے گیا ہے
--- مصرعوں میں ربط ہونا لازمی ہے - آشیانہ بنانے والا تو خوشی دینے والا ہے - آپ آگے کہتے ہیں دلاسے میں ؟ - آشیانہ بننے کے بعد دلاسہ کس بات کا - اگر آپ کے زہن میں اس سے مراد کوئی خاص واقعہ ہے تو قاری کو وہ نہیں پتا - یہ آپ کو شعر میں ہی بتانا ہوگا-

شریکِ سفر تھا جو دنیا میں میرا
وہ تکمیل سے پہلے دم دے گیا ہے
-- دیکھیے اردو محاورہ ہے دم دینا - دم دیا - دم دے گیا غلط ہے - دم توڑ چکا ہوتا ہے - صرف ردیف لانے کے لیے محاورہ نہیں بدل سکتے -

تخیل میں چہرہ ہے اس دلربا کا
جو سائے میں اپنا علم دے گیا ہے
-- علم اردو میں سائے کا استعارہ نہیں ہے - پھر دل ربا کا کوئی لفظی تعلق بھی دوسرے مصرعے سے ہونا چاہیے -

ہے یادوں کی بارات میرے حوالے
کتابوں میں مجھ کو قلم دے گیا ہے
-- یہ بات بھی مبہم ہے - کتاب میں لکھا نہیں جاتا - پڑھا جاتا ہے - کتابوں میں قلم دینا کس بات کا استعارہ ہوا سمجھ نہیں آ سکا -

محترم ارشد صاحب
السلام علیکم،
امید ہے آپ خیریت سے ہوں گے۔ اولاً، اس قدر مفصل اور مہربان تنقید کے لیے دلی شکریہ ادا کرتا ہوں۔ تاخیر سے جواب دینے پر تہہ دل سے معذرت خواہ ہوں۔ آپ کی توجہ اور رہنمائی میرے لیے باعثِ عزت ہے۔
آپ کا تجربہ بلاشبہ وسیع اور قابلِ احترام ہے، اور میں تو ابھی اس فن کا ادنیٰ سا طالبِ علم ہوں۔ میری کوشش یہی ہے کہ سیکھوں، سمجھوں اور بہتر کہنے کی جانب بڑھوں۔ آپ کی تنقید نہ صرف برمحل ہے بلکہ میرے لیے رہنمائی کا چراغ بھی ہے۔ یقین جانئے، میں نے آپ کی ہر بات کو دل سے سنا اور سنجیدگی سے لیا ہے۔
اردو زبان کی نزاکتیں، محاورے اور فصاحت میری کمزوریاں ضرور ہیں، مگر انہی کو سدھارنے کے لیے آپ جیسے استادوں کی رہنمائی درکار ہے۔ ان شاء اللہ، آپ کی نشاندہی کردہ نکات پر غور کر کے اپنی شاعری میں بہتری لانے کی کوشش کروں گا۔
خدا کرے آپ کی اصلاح اور شفقت مجھے مسلسل نصیب ہوتی رہے۔
ایک بار پھر شکریہ کہ آپ نے وقت نکالا اور میری کاوشوں کو اتنی سنجیدگی سے پڑھا۔
طالبِ دعا
محسن رضا

میری یہ غزل محض ادبی مشق نہیں بلکہ ایک ذاتی سانحے کی پکار ہے۔تین برس قبل ایک افسوسناک حادثے میں میری اہلیہ، بیٹی، ہمشیرہ اور ایک بھانجے کا انتقال ہو گیا، اور میں خود بری طرح جھلس گیا۔ انہی لمحات میں، بستر پر نیم بے ہوشی کی حالت میں، یہ اشعار دل سے خود بخود نکلے۔ آپ کی تنقید برحق ہے اور میں ہر نکتہ دل سے قبول کرتا ہوں، مگر ان اشعار میں زبان نہیں، زخم بول رہے تھے۔ آپ کی رہنمائی میرے لیے اعزاز ہے۔ اگر میری شاعری فنی کمزور ہے، تو میں آپ سے سیکھنے کو باعثِ فخر سمجھوں گا بس گزارش ہے کہ اسے ایک زخمی دل کی صدا سمجھ کر پڑھیں۔

محسن رضا صاحب - یہ دل خراش سانحہ سن کر میں دم بخود رہ گیا - سمجھ میں نہیں آ رہا آپ سے کیسے ہمدردی کروں - جس پہ گزرتی ہے وہی جانتا ہے - میری کسی بات سے آپ کو تکیف پہنچی ہو تو میں از حد معذرت خواہ ہوں -
میں آپ کے لئے دل سے دعا گو ہوں اور سمجھ سکتا ہوں کہ آپ پہ کیا گزر رہی ہوگی -

آپ کے پُرخلوص الفاظ نے دل کو بہت سہارا دیا۔ واقعی، ایسے مواقع پر الفاظ کم پڑ جاتے ہیں، مگر آپ کی ہمدردی اور دعائیں میرے لیے بہت قیمتی ہیں۔ آپ کی طرف سے کسی بات کا بُرا ماننے کا سوال ہی پیدا نہیں ہوتا بلکہ آپ کی محبت اور احساس میرے دل کو چھو گیا۔ اللہ آپ کو جزائے خیر دے اور آپ کو بھی ہر دکھ، ہر آزمائش سے محفوظ رکھے۔
آمین!