| زندگی کے ہونٹوں پر |
| غم خوشی کے قصے ہیں |
| اپنے اپنے دامن میں |
| اپنے اپنے حصے ہیں |
| سوچ کی زمینوں میں |
| یہ سوال اگتا ہے |
| ڈور کو خیالوں کی |
| کون تھامے رکھتا ہے |
| کون ہے جو آنکھوں میں |
| خواب بویا کرتا ہے |
| انکھ دیکھتی ہے جو |
| صرف ایک دھوکہ ہے |
| جانے عقل کو کس نے |
| ایک حد پہ روکا ہے |
| ایک کشمکش سی ہے |
| ایک عجیب چنگل ہے |
| بے خبر ہیں رستے سے |
| بے یقین منزل ہے |
| دل کے ہاتھ میں پہنا |
| آرزو کا کنگن ہے |
| خواہشوں کے سکوں میں |
| حسرتوں کی چھن چھن ہے |
| زندگی میں جانے کیوں |
| اتنا کھوکھلا پن ہے |
| ہے ازل سے یوں جاری |
| کھیل اس طرح کا ہے |
| زندگی تماشائی |
| آدمی تماشہ ہے |
معلومات