| وفا ملتی نہیں جب تو جفا پر زور آتا ہے |
| یہ فطرت کا تقاضا ہے جو پھر مونہہ زور آتا ہے |
| امیروں کا الگ قانون ہے اس دیس میں لوگو |
| یہاں قانون کی زد میں فقط کمزور آتا ہے |
| اُدھر تیری محبّت ہے ادھر آٹا نہیں گھر میں |
| تمہیں ہی چھوڑ دوں دل میں یہی فی الفور آتا ہے |
| ارادہ ہے کہ اب کے شہریت جنگل کی مِل جائے |
| ادھر بھی جو نیا آتا ہے آدم خور آتا ہے |
| نہ چاول ہیں نہ آٹا ہے نہ سبزی ہے نہ دالیں ہیں |
| نہ جانے کیا چرانے کو مرے گھر چور آتا ہے |
| کوئی بیمار و درماندہ کوئی حسرت زدہ مفلس |
| کسی کمرے سے مرنے مارنے کا شور آتا ہے |
| تغیّر ہے سنا تھا ہاں مگر ہم نے تو دیکھا ہے |
| غریبی تھی غریبی ہے یہی اک دور آتا ہے |
| چلو آؤ بھُلا دیں ایک دوجے کو مرے ہمدم |
| اکیلا مَیں ہوں تنہا تُم یہ حل فِل فور آتا ہے |
معلومات